नेदरलँडच्या युवतीवर वेटरने केला अतिप्रसंग; संशयितास अटक, दोघांवर चाकूने वार

बलात्काराचा आणि जिवे मारण्याचा प्रयत्न त्याच रिसॉर्टमध्ये काम करणाऱ्या एका बिगर गोमंतकीय कर्मचाऱ्याकडून करण्यात आला.

लोकमत न्यूज नेटवर्क पेडणे: गोव्यात पर्यटक म्हणून आलेल्या नेदरलँडच्या युवतीवर बलात्काराचा आणि जिवे मारण्याचा प्रयत्न त्याच रिसॉर्टमध्ये काम करणाऱ्या एका बिगर गोमंतकीय कर्मचाऱ्याकडून करण्यात आला. तिचा आरडाओरडा ऐकून शेजारील एक गृहस्थ धावून आल्यामुळे तिचा जीव वाचला. या प्रकरणी पेडणे पोलिसांनी गुन्हा दाखल केला आहे.

पोलिसांनी माहितीनुसार, गुरुवारी ही घटना उघडकीस आली. अतिप्रसंग करणारी रिसॉर्टमधील व्यक्ती शेजारच्या रूममधील व्यक्ती आल्याने युवतीला सोडून पळून गेली. मात्र नंतर तो धारधार चाकू घेऊन पुन्हा त्या युवतीच्या रूममध्ये आला व बचावासाठी आलेल्या स्थानिक व्यक्तीसह त्या युवतीवर वार केले आणि तिथून पळ काढला. घटनेनंतर दोघांना तातडीने उपचारासाठी रुग्णालयात नेण्यात आले. 

त्यानंतर पेडण्याचे पोलीस निरीक्षक दत्ताराम राऊत यांच्या मार्गदर्शनाखाली पोलीस उपनिरीक्षक विवेक हळर्णकर, हरीश वायंगणकर, तीर्थराज म्हामल, पोलीस कॉन्स्टेबल कृष्णा वेळीप, सागर खोर्जुवेकर, प्रेमनाथ सावळ - देसाई व रजत गावडे यांचे पथक तैनात करण्यात आले. त्यानंतर काही वेळातच संशयित उमेश चंद्र (वय २७, रा. त्यागी रोड, डेहराडून) याला अटक करण्यात आली. उमेश रिसॉर्टमध्ये बार वेटर म्हणून काम करत होता. यावेळी गुन्ह्यासाठी वापरलेला चाकू जप्त करण्यात आला आहे.

सर्व ठळक बातम्यांसाठी जरूर वाचा महाराष्ट्रातील अव्वल मराठी वेबसाईट "लोकमत डॉट कॉम"