पोलीस बसने सहा दुचाकींना ठोकरले

लोकमत न्यूज नेटवर्क
पणजी : पणजी आल्तिनो येथे राखीव दलातील पोलिसांना आणण्यासाठी जाणाऱ्या पोलिसांच्या मिनी बसने बुधवारी पहाटे रस्त्याच्या बाजूला पार्क करून ठेवलेल्या सहा दुचाकी वाहनांना व एका सायकला तसेच तेथील बाजूला असलेल्या घराच्या छताला ठोकर मारल्याने बरेच नुकसानी झाले.
ही घटना बुधवारी पहाटे साडेपाचच्या दरम्यान आझाद मैदानालगत गोवा चेंबर आॅफ कॉमर्सच्या जवळील जंक्शनवर घडली. पोलीस मुख्यालयातून आल्तिनो येथील राखीव दलातील पोलिसांना आणण्यासाठी गेलेल्या बसला या जंक्शनवर पोहोचल्यानंतर तेथून जाणाऱ्या एका व्हॅगनर गाडीने मागच्या बाजूने जोरदार धडक देऊन तेथून पळ काढला.
दिलेल्या धडकेने बसचालकाचे वाहनावरील नियंत्रण सुटले व त्याच ठिकाणी पार्क करून ठेवण्यात आलेल्या सहा दुचाकींना, एका सायकलला तसेच रस्त्याच्या बाजूला असलेल्या घराच्या छताला व वीजखांबाला जोरदार ठोकर दिली. त्यात बरेच नुकसान झाले.
व्हॅगनरने दिलेल्या धडकेत गाडीची क्रमांक पट्टी खाली पडली असून गाडीच्या क्रमांकावरून चालकाचा शोध घेण्याचे काम पोलिसांनी सुरू केले आहे. संबंधित बस पोलिसांना डिचोली तालुक्यातील मावळिंगे येथे घेऊन जाण्यासाठी निघाली होती. प्रकरणात रात्रीपर्यंत गुन्हा नोंद करण्यात आला नव्हता.