धक्कादायक! विमानाचा आपत्कालीन दरवाजा उघडण्याचा प्रयत्न, दाबोळी विमानतळावरील प्रकार

बेफिकीर प्रवाशाविरोधात गुन्हा नोंद, १७९ जणांचा जीव धोक्यात

पंकज शेट्ये, लोकमत न्यूज नेटवर्क, वास्को: गोव्याच्या दाबोळी विमानतळावरून चंदीगढला जाणाºया ‘इंडिगो एअरलाइन्स’ च्या विमानात एका प्रवाशाच्या निष्काळजीपणामुळे प्रवासी व केबिन क्रू सदस्यांसह १७९ जणांचा जीव धोक्यात आला होता. विमानातील प्रवासी विशाल शांडिल्य (वय २८, रा. हिमाचल प्रदेश) याने आपत्कालीन दरवाजाचे हँडल खेचल्याने विमानात तांत्रिक बिघाड निर्माण झाला. गुरुवारी (दि. ४) ही घटना घडली होती.

दाबोळी विमानतळावरील पोलिसांनी दिलेल्या माहितीनुसार, चंदीगढला जाणाºया ‘इंडिगो एअरलाइन्स’ च्या विमानातील प्रवाशी विशाल यांने निष्काळजीपणाने ‘ओव्हर विंग कव्हर फ्लॅप’ आणि आपत्कालीन दरवाजाचे कंट्रोल हँडल खेचले. त्यामुळे विमानात तांत्रिक बिघाड झाला. आपत्कालीन दरवाजा उघडण्याचा प्रयत्न झाल्याचे लक्षात येताच प्रवाशांमध्ये घबराट पसरली. मात्र, या प्रकाराने विमानात फक्त तांत्रिक बिघाड निर्माण झाला. त्यामुळे विमानातील क्रू सदस्य आणि प्रवासी अशा सर्व १७९ जणांना विमानातून खाली उतरविण्यात आले. नंतर विमानाची दुरूस्ती करून तांत्रिक बिघाड दूर झाल्यानंतर दुसºया दिवशी त्या विमानाने दाबोळीवरून उड्डाण केले.

दरम्यान, या प्रकरणी शानवा शेख यांनी दाबोळी विमानतळ पोलीस स्थानकावर तक्रार नोंदवली. त्या तक्रारीची दखल घेत पोलिसांनी विशाल शांडिल्य यांच्याविरुद्ध भादंस कलम ३३६ अन्वये गुन्हा नोंदवला. विमानतळ पोलीस स्थानकाचे सहाय्यक उपनिरीक्षक संतोष गावकर या प्रकरणाचा तपास करीत आहेत.

सुदैवाने धोका टळला...

हिमाचल प्रदेशातील प्रवासी विशाल याने नेमका असा प्रकार का केला?  याबाबत पोलिसांनी चौकशी सुरू केली आहे. त्याने निष्काळजीपणाने आपत्कालीन दरवाजाचे हँडल खेचल्याचे पोलीसांना अजूनपर्यंतच्या चौकशीत समजले आहे. सुदैवाने विमानात फक्त तांत्रिक बिघाड होऊन पुढील धोका टळला.