फर्मागुडी येथे ट्रकच्या धडकेने महिला ठार

फोंडा : रस्ता अपघातांची मालिका फोंडा परिसरात चालूच असून मंगळवारी एका ट्रकने दुचाकीला ठोकरल्याने महिला जागीच ठार झाली. दुपारी दोन वाजण्याच्या सुमारास ही घटना कोने-फर्मागुडी येथे घडली. अपघात-स्थळापासून फर्मागुडी पोलीस आउट पोस्ट अवघ्या ५00 मीटरच्या अंतरावर आहे; परंतु अपघातस्थळी पोलीस पोचले चक्क २ वाजून २५ मिनिटांनी, अशी माहिती नागरिकांनी दिली. अ‍ॅम्ब्युलन्सने पोहचण्यासाठी चक्क ४० मिनिटे घेतली.
अपघातात मरण पावलेल्या महिलेचे नाव शकीला शेख (४२, रा. शापूर-फोंडा) असे असून ती आपले पती हमीद यांच्यासह दुचाकीवरून गोमेकॉत असलेल्या एका नातेवाईक पेशंटसाठी जेवणाचा डबा घेऊन जात होत्या, अशी माहिती निकटवर्तीयांनी दिली. पती किरकोळ जखमी झाला आहे. ट्रक (क्र. जीए ०२ टी ८९८५)ने प्लेजर दुचाकीला मागून ठोकर दिली, अशी माहिती पोलिसांनी दिली. ट्रक चालक अरुण कुमार शुक्ला (रा. मडगाव, मूळचा उत्तर प्रदेश) याला अटक केली आहे.
दरम्यान, एकीकडे अपघातात एक व्यक्ती प्राण गमावून बसली आहे, तर दुसरीकडे बरेच जण मोबाईलवर फोटो घेऊन ते सोशल मीडियावर लवकरात लवकर शेअर करता यावेत यासाठी धडपड करताना दिसत होते. (प्रतिनिधी)