१०.६४ लाखांची दारू व साहित्य जप्त

तिरोडा : ग्रामपंचायत निवडणुकींची मतमाेजणी सोमवारी (दि. १८) होणार असून परिसरात शांतता राहावी या दृष्टीने पोलिसांनी ६ ठिकाणी धाड घालून १० लाख ६४ हजार ६०० रुपयांची दारू तसेच अन्य साहित्य जप्त केले आहे. तिरोडा पोलिसांनी रविवारी (दि. १७) सकाळी ही कारवाई केली आहे.

गुप्त माहितीच्या आधारे पोलिसांनी संत रविदास वॉर्ड निवासी तरासन अशोक बरियेकर यांच्या घरी धाड घातली असता तेथे हातभट्टीची दारू, साहित्य आणि ९६ प्लास्टिक पोत्यात १,९२० किलो सडवा मोहफूल असा १ लाख ५९ हजार ६०० रुपयांचा माल मिळाला. शीला विनोद खरोले यांच्या घरातून हातभट्टीची दारू, साहित्य आणि ७२ प्लास्टिक बॅगमध्ये १,४४७ किलो सडवा मोहफूल असा एकूण १ लाख १५ हजार २०० रुपयांचा माल मिळाला. वनमाला भीमराव झाडे यांच्या घरात हातभट्टीची दारू, साहित्य आणि १०८ प्लास्टिक बॅगमध्ये २,१६० किलो सडवा मोहफूल असा एकूण १ लाख ७२ हजार ८०० रुपयांचा माल मिळून आला. श्यामराव श्रीराम झाडे याच्या घरात हातभट्टीची दारू, साहित्य आणि ६४ प्लास्टिक पोत्यात १,२८० किलो सडवा मोहफूल असा एकूण १ लाख १७ हजार ४०० रुपयांचा माल मिळून आला. कलीम गफूर पठाण याच्या घरात हातभट्टीची दारू, साहित्य आणि १६२ प्लास्टिक पोत्यात ३,२४० किलो सडवा मोहफूल असा एकूण २ लाख ५९ हजार २०० रुपयांचा माल मिळून आला. तर साबीर रहीम पठाण याच्या घरी धाड घातली असता हातभट्टीची दारू, साहित्य आणि १५४ प्लास्टिक पोत्यात ३,०८० किलो मोहासडवा अशा २ लाख ४६ हजार ४०० रुपयांचा माल असा एकूण १० लाख ६४ हजार ६०० रुपयांचा माल मिळून आला. आरोपींविरुद्ध दारूबंदी कायदा अन्वये गुन्हे नोंद करण्यात आले आहेत.