वाहतूक नियम तोडणाऱ्यांचे १.२८ लाख रुपये थकून

गोंदिया : वाहतुकीच्या नियमांचे पालन करणे गरजेचे असून, नियम तोडल्यास त्याचे परिणाम कधी-कधी अंगलट येतात. मात्र, याही पेक्षा दु:खाची बाब म्हणजे एखाद्या बेजबाबदार व्यक्तीच्या चुकीची शिक्षा निरपराध व्यक्तीला भोगावी लागते. वाहतूक अपघातांतील बहुतांश प्रकरणांतील हीच स्थिती असते. यामुळेच वाहतूक अपघात टाळण्यासाठी वाहतूक नियंत्रण शाखेला नियम मोडणाऱ्यांवर कारवाईचे अधिकार देण्यात आले आहेत. त्यानुसार वाहतूक नियंत्रण शाखेकडून नियम तोडणाऱ्यांवर विविध कलमांतर्गत कारवाया केल्या जात असून, यात अधिकांश प्रकरणांत दंडात्मक कारवाया केल्या जातात. जिल्ह्यात त्यानुसार, वाहतूक नियंत्रण शाखेने सन २०२१ मध्ये विविध प्रकारांत १३२०० दंडात्मक कारवाया केल्या आहेत. यातील १२६७५ कारवायांतील २७ लाख ५६ हजार ०५० रुपयांचा दंड वसूल करण्यात आला आहे, तर ५२५ कारवायांतील एक लाख २८ हजार १०० रुपयांचा दंड अद्यापही संबंधितांवर थकून आहे.

----------------------------------

२०२१ मधील आकडेवारी काय सांगते

- किती जणांनी तोडला नियम - १३२००

एकूण दंडाची रक्कम -२८८४१००

किती व्यक्तींनी भरला दंड -१२६७५

भरलेला दंड - २७५६०५०

किती व्यक्तींनी दंड भरलाच नाही - ५२५

थकबाकी दंडाची रक्कम - १२८१००

१) २०२०-२०२१ मध्ये झालेली कारवाई (ग्राफ)

२०२०-२०२१

विना हेल्मेट १९

विना सीटबेल्ट २४२५

ओव्हर स्पीड १५७

मोबाईलवर बोलणे ३०

नो पार्किंग २१९

ट्रिपल सीट ४१०

विना लायसन्स ८३३३

फॅन्सी नंबर प्लेट १६

म्युझिकल हॉर्न ४९

--------------------------------

परवाना नसलेल्यांवरच सर्वाधिक कारवाया

- सध्या विद्यार्थ्यांच्या सकाळपासूनच ट्यूशन क्लासेस सुरू होत असून, त्यांना दिवसभर धावपळ करावी लागते. अशात पालक आपल्या पाल्यांच्या सोयीसाठी वाहन खरेदी करून त्यांना देत आहेत. मात्र, हे करताना त्यांचा परवाना आहे की नाही याकडे लक्ष देत नाहीत.

- आजघडीला ५००-१००० रुपये भरले तर गाडी आपल्या घरात आणता येते अशी सुविधा उपलब्ध झाली आहे. यामुळे प्रत्येकाकडे आता दुचाकी झाली आहे. मात्र, दुचाकी घेऊनच होत नसून त्यासाठी परवाना काढावा लागतो याकडे लक्ष द्यायला त्यांना वेळच नाही.

- परवाना नसल्यास वाहतूक पोलिसांकडून जास्तीत जास्त १०० रुपयांचे चलन होत असल्याचा समज आजही कित्येक नागरिकांत आहे. त्यामुळे परवाना काढण्याची भानगड पाळण्यापेक्षा १०० रुपये दिलेले बरे अशा तोऱ्यात ते वागतात.

----------------------------

लवकर दंड न भरल्यास...

- वाहतूक नियंत्रण शाखेने एखाद्या वाहनावर कारवाई केल्यानंतर त्याने दंडाची रक्कम कित्येक दिवस भरली नसली तरीही त्यावर व्याज लावता येत नही. आहे ती रक्कमच नियमानुसार घ्यावी लागते.

- एखाद्या व्यक्तीने दंडात्मक कारवाई झाल्यावर पैसे न भरल्यास वाहतूक नियंत्रण शाखा दंडाची रक्कम वाढवू शकत नाही. यामुळेही कित्येकांकडून दंड थकविला जातो.

- मात्र, दंडाची रक्कम थकवून असलेली व्यक्ती दुसऱ्यांदा वाहतूक पोलिसांच्या हाती लागल्यास त्याची माहिती मशीनद्वारे उपलब्ध होते व अशात वाहन जप्त केले जाते. जुनी रक्कम वसूल झाल्यावर ते वाहन सोडले जाते.