जुन्या पेन्शनच्या समर्थनार्थ झळकले नक्षल्यांचे बॅनर

आमगाव-सालेकसा मार्गावर सीपीआय माओवादी या नक्षल संघटनेचे बॅनर

गोंदिया : गेल्या आठवड्यात जुन्या पेन्शनच्या मुद्यावर राज्य सरकारी कर्मचारी व अधिकाऱ्यांनी आंदोलन करून सरकारला जेरीस आणले होते. मात्र संघटनांच्या समन्वय समितीने संप मागे घेतल्याने जुन्या पेन्शनचा प्रश्न तसाच कायम राहिला. परंतु कर्मचाऱ्यांना पेन्शन देण्यात यावी, या मागणीसाठी रविवारी (दि. २६) आमगाव-सालेकसा मार्गावर सीपीआय माओवादी या नक्षल संघटनेचे बॅनर लावण्यात आले आहे.

जुन्या पेन्शनला समर्थन असल्याचे नक्षलवाद्यांचे बॅनर असून यात नवीन पेन्शन योजना रद्द करण्यात यावी, ठेकेदारीकरण बंद करण्यात यावे, मेस्मा कायदा लागू करणारे शिंदे-फडणवीस सरकार मुर्दाबाद अशा अनेक घोषणा आहेत. सोबतच पत्रकदेखील काढलेले आहे. या पत्रकात महाराष्ट्र, मध्यप्रदेश, छत्तीसगड झोनल (माओवादी) कमिटीचे प्रवक्ता अनंत असे नाव लिहिलेले आहे.