कटंगी डॅममध्ये मान्सून पूर्व तयारीची रंगीत तालीम

गोंदिया : मान्सूनपूर्व तयारी २०२१च्या अनुषंगाने जिल्हा आपत्ती व्यवस्थापन प्राधिकरणाच्या वतीने पूर परिस्थितीत शोध बचाव कार्य संबंधाने गोरेगाव कटंगी डॅममध्ये शनिवारी (दि.२९) शोध व बचाव कामाची रंगीत तालीम घेण्यात आली.

मागील वर्षी सन २०२० मध्ये जिल्ह्यात आलेली पूर परिस्थिती लक्षात घेऊन, या वर्षी जिल्हा प्रशासनाकडून प्रत्येक तालुक्यात नागरिकांसाठी शोध व बचाव प्रशिक्षण कार्यक्रम व पूर परिस्थितीत सुरक्षा व बचावाबाबत कार्यशाळा आयोजित करण्यात येणार आहे. पूर परिस्थितीत जीवित व वित्तीय हानीचे प्रभाव कमी करण्यासाठी जिल्हा आपत्ती व्यवस्थापन प्राधिकरणच्या वतीने हा कार्यक्रम राबविण्यात येणार आहे. त्यानुषंगाने नागरिकांना पूर परिस्थितीत तत्काळ मदत पुरविण्यासाठी जिल्हा शोध व बचाव पथकातर्फे रंगीत तालीम कार्यक्रमाचे आयोजन करण्यात आले होते.

या कार्यक्रमात नागपूर येथून आलेले मोजेस कॉन्द्रा, निकेश चिखलोंडे, शोध बचाव पथकाचे सदस्य किशोर टेंभुर्णे, नरेश उके, राजकुमार बोपचे, जसवंत रहांगडाले, रवि भांडारकर, संदीप कराडे, दिनू दीप, इंद्रकुमार बिसेन, चुन्नीलाल मुटकुरे, चिंतामण गिरेपुंजे आदी उपस्थित होते. मान्सूनपूर्व तयारीच्या अनुषंगाने गावपातळीवर जिल्हा आपत्ती व्यवस्थापन समिती स्थापन करण्यात आली आहे, तसेच हवामान खाते व पूर परिस्थितीसंदर्भात नागरिकांना व्हाॅट्सॲप ग्रुपच्या माध्यमातून माहिती देण्याकरिता, तालुका व गावपातळीवर व्हाॅट्सॲप ग्रुप तयार करण्यात येत आहेत.