महाराष्ट्रात ‘ज्योतिषशास्त्र’ हा विषय सुरू करू नका

सडक अर्जुनी : महाराष्ट्रात इग्नू (इंदिरा गांधी राष्ट्रीय मुक्त विद्यापीठ) यांचा ‘ज्योतिषशास्त्र’ हा विषय सुरू न करण्याबाबतचे निवेदन सोमवारी (दि.९) अखिल भारतीय अंधश्रद्धा निर्मूलन समिती तालुका सडक अर्जुनीच्या वतीने मुख्यमंत्र्यांच्या नावे तहसीलदारांना देण्यात आले.

महाराष्ट्राला संत आणि समाज सुधारकांची शेकडो वर्षांची परंपरा लाभलेली आहे. आपल्या भूमीचा ‘बुद्धीच्या देशा’ असा उल्लेख केला जातो. संत चक्रधर स्वामींपासून ते थेट संत गाडगे महाराजांपर्यंत प्रबोधनाची परंपरा आहे, तर दुसऱ्या बाजूला महात्मा जोतीराव फुलेंपासून, डॉ. बाबासाहेब आंबेडकर ते प्रबोधनकार ठाकरेपर्यंत समाज सुधारक होऊन गेलेत. त्यांची परंपरा चालू ठेवणे, हे प्रत्येक महाराष्ट्रातील सुज्ञ युवकाचे कर्तव्य आहे. अशावेळी ‘इग्नू’तर्फे यंदाच्या वर्षापासून ‘ज्योतिषशास्त्र’ या विषयात पदवी आणि पदविका हे अभ्यासक्रम सुरू करण्यात येणार आहेत. खगोलशास्त्रज्ञ ज्योतिषाला

मान्यता देत नाहीत

ज्योतिषाचा अभ्यासक्रम सुरू करणे म्हणजे लोकांना अंधश्रद्धेच्या दरीत लोटण्यासारखे आहे. स्वामी विवेकानंद व स्वातंत्र्यवीर सावरकर यांनीही ज्योतिषशास्त्राला कडाडून विरोध केलेला आहे. ज्योतिषशास्त्र हा अभ्यासक्रम शिकून महाराष्ट्रामध्ये कर्मकांड करणारे आणि आपला वेळ पैसा आणि श्रम वाया घालवणारे तरुण युवक तयार होतील. समाज विज्ञानाच्या दिशेने जाण्याऐवजी अज्ञानाच्या दिशेने ढकलला जाईल, हे थांबवण्यासाठी इग्नूच्या ‘ज्योतिषशास्त्र’ या अभ्यासक्रमाला मान्यता देऊ नये, म्हणून अखिल भारतीय अंधश्रद्धा निर्मूलन समिती तालुका सडक अर्जुनीच्या वतीने नायब तहसीलदार आर.एस. खोकले यांना निवेदन देण्यात आले. यावेळी अंनिसचे तालुकाध्यक्ष उमेश उदापुरे, सचिव अनिरुद्ध पारधी, मार्गदर्शक डॉ. राजकुमार भगत, जिल्हा प्रसिद्धीप्रमुख आर.व्ही. मेश्राम, सदस्य अमोल खोब्रागडे, सामाजिक कार्यकर्ते डॉ. अविनाश काशीवार, शिवाजी गहाणे उपस्थित होते.