शस्त्र परवान्याचीही फॅशन; जिल्ह्यात ५१७ जणांकडे परवाने!

गोंदिया : गोंदियात संघटित गुन्हेगारी सक्रिय आहे. गुन्हेगारांवर आळा घालण्यासाठी पोलीस यंत्रणा आरोपींवर मोक्का लावतात. तरीदेखील काही टोळ्या टप्प्याटप्याने जन्म घेत आहेत. गोंदिया शहरात मोठ्या प्रमाणात देशी कट्टे वापरणारे लोक आहेत. आपसी वैमनस्यातून एकमेकांचा काटा काढण्यासाठी किंवा एकमेकाला धमकाविण्यासाठी या देशी कट्ट्यांचा सर्रास वापर केला जात आहे. मध्यप्रदेश व छत्तीसगड येथून गोंदियात येणाऱ्या या देशी कट्ट्यांच्या गोरखधंद्याला पायबंद घालण्याची गरज आहे. आता शस्त्र परवान्याचीही फॅशन तयार झाली असून गोंदिया जिल्ह्यात ५१७ जणांकडे परवाने असल्याची माहिती पुढे आली आहे.

गोंदिया शहराला काही बड्या लोकांनी मिनी मुंबई म्हणून संबाेधले आहे. या मिनी मुंबई असलेल्या गोंदिया जिल्ह्यात मोठ्या प्रमाणात देशी कट्टे वापरले जात आहेत. एखादा गुन्हा घडला तर त्या देशी कट्ट्यांचा विषय पुढे येतो अन्यथा या देशी कट्ट्यांकडे दुर्लक्ष हाेत आहे. परवाना घेतल्याशिवाय बंदूक वापरता येत नाही. परंतु गोंदिया विनापरवाना मोठ्या प्रमाणात देशी कट्टे वापरले जात आहेत. रेती माफियांचा वाद झाला किंवा गॅंगवार झाला यावेळी देशी कट्ट्यांचा वापर होताना दिसत आहे. गोंदिया शहरात दिवसाढवळ्या देशी कट्ट्यांची विक्री होत आहे. याचा प्रत्यय स्वत: गोंदियाच्या पोलिसांना आला. स्थानिक गुन्हे शाखेच्या पोलिसांनी सापळा रचून देशी कट्टा विक्री करण्याच्या तयारीत असलेल्या दोघांना रंगेहात पकडले होते. एखाद्याचे प्रेम प्रकरण असो किंवा वैमनस्य यात टोकाची भूमिका घेतलेल्या लोकांनी एकमेकांना संपविण्यासाठी देशी कट्ट्यांचा वापर केल्याच्या घटना गोंदिया जिल्ह्यात यापूर्वी घडल्या आहेत.

.............................................

मध्य प्रदेश व छत्तीसगडमधून पुरवठा

देशी कट्टा गोंदियात मध्य प्रदेश व छत्तीसगड या दोन राज्यातून होतो. बिहार आणि उत्तर प्रदेशातूनही देशी कट्टा गोंदियात येत असल्याची माहिती आहे. हे देशी कट्टे २० हजारांपासून तर लाखो रुपये किमतीला विक्री होत असल्याची माहिती आहे. या देशी कट्ट्यांच्या विक्रीला लगाम लावण्याची गरज आहे.

........................

पोलिसांनी धडक मोहीम राबवावी

अवैध धंद्यांना आळा घालण्यासाठी पोलीस यंत्रणा काम करते. दारू, जुगार व इतर अवैध धंद्यांना लगाम लावण्यासाठी पोलीस काम करतात. मग जीवघेण्या घटना गोंदियात घडविण्यासाठी विक्री होणाऱ्या देशी कट्ट्यांच्या व्यवसायाला पोलिसांनी आळा घालण्याची गरज आहे. गोंदिया शहरात शेकडो देशी कट्टे विना परवाना वापरत आहेत. त्यांच्या घराची झडती घेण्यासाठी पोलिसांनी तत्परता दाखवून मोठ्या प्रमाणात असलेले देशी कट्टे जप्त करावेत.

.........................

आत्मसंरक्षणासाठी १८७ बंदूक

गोंदिया जिल्ह्यातील १८७ लोकांनी आत्मसंरक्षणासाठी बंदुका घेतल्या आहेत. ३३० जणांनी पीक संरक्षणासाठी बंदुका घेतल्या आहेत. बॅंकेच्या संरक्षणासाठी असलेल्या बंदुकांचाही यात समावेश आहे. जिल्हाधिकारी बंदूक परवाना देण्याची मंजुरी देतात. मंजुरीनंतरच आपल्याला बंदूक वापरता येते.

.........................

शस्त्र परवाना काढण्यासाठी करावा अर्ज

एखाद्याला आत्मसंरक्षणासाठी बंदुकीची गरज असेल तर त्यांनी जिल्हाधिकाऱ्यांकडे अर्ज करून त्या अर्जात शस्त्र कशासाठी पाहिजे, हे नमूद करावे लागते. हा परवाना मिळविण्यासाठी विविध कागदपत्रांबरोबर पोलिसांचे चारित्र्य प्रमाणपत्र जोडणे अत्यंत आवश्यक आहे. गुन्हेगारी प्रवृत्तीच्या व्यक्तीला परवाना नाकारला जातो.

.....................