दोन बिबट्याच्या शिकारप्रकरणी चौघांना अटक

गोंदिया : गोरेगाव वनपरिक्षेत्रात असलेल्या इंदिरानगर तिल्ली येथील देवानंद सोनवाणे यांच्या शेतातील विहिरीत ३ जानेवारीला एक बिबट आढळला. या बिबट्याच्या मृत्यूचा कारणांचा शोध घेत असता ४ जानेवारीला त्याच घटनास्थळालगत लागून असलेल्या जंगलात झुडपामध्ये दुसऱ्या बिबट्याचा मृतदेह कुजलेल्या अवस्थेत आढळला होता. या प्रकरणात आणखी दोन आरोपींना अटक करण्यात आली. त्यामुळे या प्रकरणातील आरोपींची संख्या चार झाली आहे.

आरोपीत हेतराम मधू गावळ (३८) रा. इंदिरानगर तिल्ली, देवराम श्यामलाल नागपुरे (३०) रा. चोपा (बाजारटोला) यांना आधीच अटक करण्यात आली हाेती. आज (दि.१७) रोजी लिंगम रमेश येरोला (५५) रा. चोपा बाजारटोला, हेतराम गणपत मेश्राम (४१) रा. चोपा बाजारटोला या दोघांना अटक करण्यात आली. लिंगम याने गावातीलच मन्साराम यांच्या घरी लपवून ठेवलेली चार वाघनखे जप्त करण्यात आली. यातील दोन आरोपींना न्यायालयाने २० जानेवारीपर्यंत वनकोठडी सुनावली आहे. रविवारी दोन आरोपींना अटक करण्यात आली. त्यांना १८ जानेवारी रोजी न्यायालयात हजर केले जाणार आहे. या प्रकरणात दोन्हीही बिबट्यांचे पुढच्या पायाचे पंजे शिकाऱ्यांनी चोरून नेले होते. एका बिबट्याचे डोके चोरले आहे. शिवाय मृत निलगाईचे मांस स्वतः खाण्यासाठी व इतरांना खाण्यासाठी पैशाच्या मोबदल्यात विक्री केल्याची माहिती वनाधिकाऱ्यांना मिळाली. आरोपींनी विद्युत करंट लावून रात्रीच्या वेळी शिकार केली. झडतीदरम्यान वनविभागाने बिबट्याचे दोन पंजे नखासहित, चितळाचे मुंडके, वन्यप्राण्यांची हाडे, रविवारी (दि.१७) लिंगम रमेश येरोला याच्याकडून चार नखे जप्त केली आहेत. या प्रकरणाचा तपास सुरू आहे.