रविप्रसादचा खून करणाऱ्या चौघांना अटक

गोंदिया : रेतीची तुटलेली पार्टनरशिप आणि रखडलेल्या आर्थिक व्यवहारामुळे शहरातील रिंगरोडवरील सहयोग हॉस्पिटल परिसरात धारदार शस्त्राने वार करून रविप्रसाद राधेलाल बंभारे (३५, रा. लोधीटोला) याचा गुरुवारी (दि. १४) रात्री खून करण्यात आला. या प्रकरणातील चारही आरोपींना अटक करण्यात आली आहे.

आरोपींमध्ये श्याम उर्फ पी. टी. चाचेरे, शुभम परदेशी, प्रशांत भालेराव ऊर्फ कालू मातादिन व शाहरुख शेख या चौघांना शनिवारी (दि. १६) पहाटे ३ वाजता अटक करण्यात आली आहे. या गुन्ह्यात वापरण्यात आलेली स्कॉर्पिओ क्रमांक एमएच १४-वाय ७७७७ हे वाहन जप्त करण्यात आले नाही. मृत रविप्रसाद बंभारे याने आरोपी श्याम ऊर्फ पी.टी. चाचेरे सोबत रेती व्यवसायाची पार्टनरशिप केली होती. परंतु पैशांमुळ दोघांत झालेल्या मतभेदांमुळे नोव्हेंबर महिन्यात ही पार्टनरशिप तुटली होती. तेव्हापासून रविप्रसाद हा एकटाच रेतीचा व्यवसाय करीत होता. यामुळे चाचेरे याने त्याला ठार करण्याचा कट रचला होता. घटनेच्या ४ दिवसांपूर्वी चाचेरे याने मृत रविप्रसादला फोन करून ठार करण्याची धमकी दिली होती. त्याचा वचपा गुरुवारी (दि. १४) रात्री १० वाजताच्या सुमारास काढण्यात आला. रविप्रसादच्या पोटावर तलवार, गुप्ती, चाकूने १५ ते २० घाव करून त्याचा खून करण्यात आला. रामनगर पोलिसांनी भादंविच्या कलम ३०२, ३४ अन्वये गुन्हा दाखल केला आहे. तपास ठाणेदार प्रमोद घोंगे करीत आहेत.