बिबट शिकाऱ्यांच्या वनकोठडीत वाढ

गोंदिया : तिल्ली-मोहगाव येथील शेताजवळ करंट लावून दोन बिबट्यांची शिकार करण्यात आली. या प्रकरणात अटक करण्यात आलेल्या चार आरोपींना २० जानेवारीपर्यंत वनकोठडी सुनावण्यात आली होती. त्या आरोपींना आज (दि.२०) रोजी गोंदियाच्या जिल्हासत्र न्यायालयात हजर केले असता, न्यायालयाने त्या आरोपींना पुन्हा पाच दिवसांच्या वनकोठडीत वाढ केली आहे.

इंदिरानगर तिल्ली येथील देवानंद सोनवाने यांच्या शेतातील विहिरीत ३ जानेवारीला एक बिबट विहिरीत आढळला. या बिबट वन्यप्राण्याचा मृत्यूचा कारणांचा शोध घेत असता, ४ जानेवारी त्याच घटनास्थळालगत लागून असलेल्या जंगलात झुडपांमध्ये दुसरा बिबट्याचा मृतदेह कुजलेल्या अवस्थेत आढळला. जवळच निलगायीचे अवषेश आढळले. या प्रकरणात हेतराम मधू गावळ (३८) रा.इंदिरानगर तिल्ली, देवराम श्यामलाल नागपुरे (३०) रा. चोपा (बाजारटोला), लिंगम रमेश येरोला (५५) रा.चोपा बाजारटोला, हेतराम गणपत मेश्राम (४१) रा.चोपा बाजारटोला या चौघांना अटक करण्यात आली. लिंगम याने गावातीलच मन्साराम यांच्या घरी लपवून ठेवलेले ४ नखे जप्त करण्यात आले. एका बिबट्याचे मुंडके कापून आरोपींनी गौरीटोला ते चांगोटोलादरम्यान असलेल्या पांगोली नदीच्या पाण्यात त्या बिबट्याचे मुंडके गाडून ठेवल्याची माहिती आरोपी हेतराम मधू गावळ (३८) याने वनाधिकाऱ्यांना दिली. दात, मिशी यांच्यासह मुंडके हे वनविभागाने जप्त केले. न्यायालयाने वाढवून दिलेल्या वन कोठडीत आणखी तपासात मदत होणार, अशी माहिती सहाय्यक उपवनसंरक्षक राजेंद्र सदगीर यांनी दिली आहे.