रहदारीच्या मार्गावर पडला मोठा ‘खड्डा’ ()

बोंडगावदेवी : गावातून जाणाऱ्या बाराभाटी मार्गावर गावाजवळ रस्त्यावर मोठा खड्डा पडला. रस्त्याच्या मधोमध खड्डा पडल्याने या ठिकाणी अपघात होण्याची शक्यता नाकारता येत नाही. ये-जा करणाऱ्यांना त्रास होऊ नये यासाठी सार्वजनिक बांधकाम विभागाने त्वरित खड्डा बुजविण्याची मागणी सरपंच प्रतिमा बोरकर यांनी केली आहे.

बोंडगावदेवी ते बाराभाटी मार्गावरून एसटी महामंडळाच्या बसेस, खासगी वाहतूक मोठ्या प्रमाणात सुरू आहे. हा मार्ग ठिकठिकाणी उखडून गेला असून गिट्टी सर्वत्र पसरलेली दिसत आहे. सार्वजनिक बांधकाम उपविभाग अर्जुनी मोरगावच्यावतीने या रस्त्याची डागडुजी केली जाते. या मार्गावरील खांबी नाल्यासमोर रस्त्याच्या मधोमध मोठा खड्डा पडला आहे. खड्ड्यामुळे या ठिकाणी अपघात होण्याची शक्यता नाकारता येत नाही. नियमित रहदारीचा मार्ग असल्यामुळे सार्वजनिक बांधकाम विभागाने वेळीच खड्डा बुजविण्याच्या कामाला प्राधान्य द्यावे अशी मागणी सरपंच प्रतिमा बोरकर यांनी या विभागाला दिलेल्या पत्रातून केली आहे.