मामा तलाव दुरूस्ती कामाचा शुभारंभ

जिल्ह्यातील माजी मालगुजारी तलावातील क्षमता वाढावी व त्या माध्यमातून जास्तीत जास्त क्षेत्र सिंचनाखाली यावे ..

गोंदिया : जिल्ह्यातील माजी मालगुजारी तलावातील क्षमता वाढावी व त्या माध्यमातून जास्तीत जास्त क्षेत्र सिंचनाखाली यावे यासाठी सडक-अर्जुनी तालुक्यातील खैरी, माहुली येथील पाटबंधारे विभागाच्या अधिनस्त असलेल्या माजी मालगुजारी तलावांच्या विशेष दुरूस्ती व पुनर्स्थापना कामाचा शुभारंभ पालकमंत्री राजकुमार बडोले यांच्या हस्ते करण्यात आला.
जिल्ह्यात असलेले माजी मालगुजारी तलाव नादुरुस्त असल्यामुळे त्यांची पाणी साठवण क्षमता कमी होऊन सिंचनाचे क्षेत्र कमी झाले आहे. या तलावांच्या दुरूस्तीच्या कामामुळे शेतकऱ्यांची सिंचन क्षमता वाढून पिकांची उत्पादकता वाढण्यास मदत होणार असल्याचे ना.बडोले यावेळी म्हणाले.
कार्यकारी अभियंता नरेंद्र ढोरे यांनी सांगितले की, ९० लक्ष रुपये खर्चून खैरी येथील तलावातील गाळ काढण्यात येईल. कालव्यांचे गेट व पाटचाऱ्यांची दुरूस्तीही करणार असल्याचे त्यांनी सांगितले.
कार्यक्रमाला पाणी वाटप संस्थेचे अध्यक्ष महादेव कापगते, सचिव अ‍ॅड. प्रकाश परशुरामकर, माजी सरपंच माधवराव परशुरामकर, पोलीस पाटील भृंगराज परशुरामकर, उपविभागीय अभियंता ए.एच.डोंगरे, तहसीलदार परूळेकर, शाखा अभियंता व्ही.एम.श्रीवास्तव, सुभाष मेश्राम व परिसरातील ग्रामस्थ उपस्थित होते. आभार मनोहर परशुरामकर यांनी मानले. (जिल्हा प्रतिनिधी)