इसमाकडून जप्त केली नऊ लाखांची रोकड

गोंदिया : संशयास्पदरीत्या वावरत असलेल्या इसमाला रेल्वे पोलिसांनी पकडले असता त्याच्या बॅगमधून तब्बल आठ लाख ९० हजार ७५० रुपयांची रोख रक्कम पोलिसांच्या हाती लागली आहे. रेल्वे स्थानकाच्या मुख्य प्रवेशद्वार परिसरात मंगळवारी (दि.१५) दुपारी ही कारवाई करण्यात आली आहे.

रेल्वे पोलीस सहायक निरीक्षक संदीप गोंडाणे, उपनिरीक्षक प्रवीण भिमटे, हवालदार मनोज गुप्ता, चंद्रकांत भोयर, कुणाल गिरनतवार हे रेल्वेस्थानकावरील फलाट क्रमांक-१ येथे गस्तीवर असताना त्यांना मुख्य प्रवेशद्वार परिसरात एक इसम संशयास्पदरीत्या खांद्यावर काळी बॅग घेऊन वावरताना दिसला. एवढेच नव्हे तर पोलिसांना बघून तो नजर चुकवून पळून जाण्याच्या प्रयत्नात असताना पोलिसांनी त्याला पकडले. विचारपूस केली असता त्यांना आपले नाव राजकुमार प्रभूलाल देवांगण (रा.शंकरपूर, राजनांदगाव) असे सांगितले. त्याच्या बॅगची पाहणी केली असता त्यामध्ये रोख आठ लाख ९० हजार ७५० रुपये मिळून आले. मात्र, त्याने या रकमेबाबत माहिती देण्यास असमर्थता दर्शविली. पोलिसांनी त्याला ताब्यात घेतले असून, प्रकाराबाबत आयकर विभागाला माहिती दिली आहे. प्रकरणी पुढील कार्यवाही आयकर विभाग करीत आहे.