आता एका क्लिकवर मिळणार रेशनकार्डची माहिती

गोंदिया : जिल्ह्यातील दोन लाख २३ हजार ४४७ शिधापत्रिकाधारकांना ९९८ स्वस्त धान्य दुकानांच्या माध्यमातून दर महिन्याला स्वस्त धान्याचा पुरवठा केला जातो. मात्र, बरेचदा माहितीअभावी शिधापत्रिकाधारक स्वस्त धान्याची उचल करण्यापासून वंचित राहतात, तर बरेचदा त्यांच्या नावावरसुद्धा परस्पर स्वस्त धान्याची उचल केली जाते. मात्र, या सर्व तक्रारी दूर होणार असून, शिधापत्रिकाधारकांना याची माहिती मेरा रेशन ॲप डाऊनडोड करून एका क्लिकवर मिळणार आहे. त्यामुळे स्वस्त धान्य मिळत नसल्याच्या तक्रारी बऱ्याच प्रमाणात कमी करण्यास मदत होणार आहे. विशेष म्हणजे मेरा रेशन ॲप शिधापत्रिकाधारकांनी डाऊनलोड केल्यानंतर त्यावर शिधापत्रिकाधारकांना त्यांच्या तक्रारीसुद्धा करता येणार आहेत. एवढेच नव्हे, तर शिधापत्रिकाधारकाने स्वस्त धान्याची उचल केली किंवा नाही, त्याच्या नावावर इतरांनी तर धानाची उचल केली नाही ना, त्यांची शिधापत्रिका रद्द तर झाली नाही ना याची चाचपणीसुद्धा या ॲपच्या माध्यमातून करता येणार आहे. आजकाल जवळपास सर्वच जणांकडे अँड्राॅईड मोबाईल आहेत. त्यामुळे या ॲपच्या मदतीने स्वस्त धान्याची माहिती घेण्यास मदत होणार आहे.

.........

तक्रार ॲपवर नोंदवा

- मेरा रेशन ॲपवर शिधापत्रिकाधारकांना त्यांच्या तक्रारीसुद्धा नोंदविता येणार आहेत. या ॲपसंदर्भात अद्याप जिल्हा पुरवठा विभागाला कसल्याच सूचना प्राप्त झालेल्या नाहीत. सूृचना प्राप्त होताच यावरील तक्रारींचीसुद्धा दखल घेतली जाणार आहे.

- स्वस्त धान्य दुकानदारांकडून स्वस्त धान्य देण्यास टाळाटाळ, कमी धान्याच्या तक्रारी, परस्पर धान्याची विल्हेवाट, स्वस्त धान्याची काळ्याबाजारात होत असलेली विक्री, आदीसंबंधी तक्रारी शिधापत्रिकाधारकांना या ॲपच्या माध्यमातून करता येणार आहेत.

......

कोट

मेरा रेशन ॲपच्या अंमलबजावणीबाबत शासनाकडून अद्यापही जिल्हा पुरवठा विभागाला कसल्याच सूचना प्राप्त झालेल्या नाहीत. सूचना प्राप्त होताच याची अंमलबजावणी केली जाईल.

- डी. एस. वानखेडे, जिल्हा पुरवठा अधिकारी.

.............

क्लिकवर मिळणार ही माहिती

शिधापत्रिकाधारकांना मिळणारे धान्य, जवळपास असलेले स्वस्त धान्य दुकान, स्वस्त धान्य दुकानातून उचल केलेल्या स्वस्त धान्याची माहिती, शिधापत्रिका पात्र आहे की अपात्र या संबंधीची माहिती, तसेच कोणत्या महिन्यात शिधापत्रिकेवर कोणते धान्य उपलब्ध करून देण्यात आले याची माहिती मिळणार आहे.

..............

जिल्ह्यातील एकूण शिधापत्रिकाधारक

२२३४४७

बीपीएल लाभार्थी

७८५१८

केशरी शिधापत्रिकाधारक

१४४५२९

पांढरे शिधापत्रिकाधारक

४८४२

...............