ऑनलाइन सातबारा न झालेल्या ७ गावांतील धान खरेदीचा मार्ग मोकळा

गोंदिया : सातबारा ऑनलाइन न झाल्याने धान खरेदीपासून वंचित असलेल्या ७ गावांतील शेतकऱ्यांची ही समस्या आमदार विनोद अग्रवाल यांच्या मध्यस्थीने अखेर सुटली आहे. याबाबत शासन आदेश निर्गमित झाले असून, या गावांतील धान खरेदीचा प्रश्न सुटला आहे.

गोंदिया लगतच्या ७ गावांमधील शेतकरी बांधवांचा सातबारा ऑनलाइन न झाल्यामुळे शेतकरी बांधवांना रबी धानाची विक्री कुठे करायची, असा प्रश्न उद्भवला होता. यासंदर्भात शेतकरी बांधवांनी आमदार अग्रवाल यांची भेट घेऊन धान विक्रीचा तिढा सोडवण्याची विनंती केली होती. शासन निर्णयाप्रमाणे ज्या शेतकऱ्यांचा सातबारा ऑनलाइन पोर्टलवर नोंदवल्या गेला नव्हता त्यांचे धान खरेदी करण्यात येणार नाही, असे स्पष्ट करण्यात आले होते. आ. अग्रवाल यांनी गोंदिया ते मुंबई पाठपुरावा केला. अन्न व नागरी पुरवठा विभाग सचिव विलास पाटील व सहसचिवांची भेट घेत त्यांना ७ गावांमधील सातबारा ऑनलाइन न झालेल्या शेतकऱ्यांचे धान खरेदी करण्याबाबत विनंती केली होती. त्याअनुषंगाने शासन निर्णय निर्गमित करण्यात आले असून, ऑनलाइन सातबारा न झालेल्या ७ गावांचा धान खरेदीचा मार्ग मोकळा झाला आहे.

-------------------

यापुढे समस्या निर्माण होणार नाही

मागील खरीप हंगामात देखील ७ गावांमधील शेतकऱ्यांच्या धान खरेदीचा प्रश्न उद्भवला होता. यंदाच्या रबी हंगामातही तोच प्रश्न परत आल्याने आमदार अग्रवाल यांनी विषयाच्या तळात जाऊन असे परत परत घडू नये म्हणून सगळे सातबारे ऑनलाइन करवून घेतले आहेत. ज्यामुळे ७ गावांमधील धान खरेदीची समस्या यापुढे उद्भवणार नाही, असा विश्वास आमदार अग्रवाल यांनी व्यक्त केला आहे.