गोरेगावच्या नायरा हॉस्पिटलची नोंदणी रद्द

गोंदिया : विनापरवानगीने कोरोना रुग्णांवर उपचार करणाऱ्या गोरेगाव येथील नायरा मल्टिस्पेशॉलिटी हॉस्पिटलची मान्यता रद्द करण्याचे आदेश जिल्हा शल्य चिकत्सक अमरीश मोहबे यांनी १५ मे रोजी काढले आहेत.

कोरोना रुग्णांवर उपचार करण्याची परवानगी नसताना नायरा हॉस्पिटलमध्ये कोरोना रुग्णांवर उपचार केले जात होते. याची माहिती स्थानिक प्रशासनाला दिली नव्हती. कोरोना रुग्णांना सेवा देण्यासाठी वापरण्यात आलेले साहित्य उघड्यावर टाकण्यात आले. या प्रकरणाची तक्रार स्थानिक प्रशासनाकडे केल्याने उपविभागीय अधिकारी, गोरेगावचे ठाणेदार, तहसीलदार यांनी १९ एप्रिल रोजी या हॉस्पिटलला भेट दिली. तेव्हा हॉस्पिटलमध्ये १४ कोरोना रुग्ण उपचार घेत असल्याचे लक्षात आले. याची माहिती डॉ. लक्ष्मीकांत वाघमारे यांनी स्थानिक प्रशासनास न देता रुग्णांचा जीव धोक्यात घालून उपचार केले. या हॉस्पिटलमधील जैविक कचऱ्याची विल्हेवाटदेखील विहित पद्धतीने न लावता हॉस्पिटलच्या परिसरात इतरत्र फेकण्यात आल्याने स्थानिकांच्या जीवितास धोका निर्माण झाला. या हॉस्पिटलवर प्रशासनाने दंड आकारला होता, परंतु डॉ. लक्ष्मीकांत वाघमारे यांनी तो दंडही भरला नाही. त्यामुळे गोरेगावच्या नगरपंचायतमधील प्रशासकीय अधिकारी आशुतोष रंगराव कांबळे यांच्या तक्रारीवरून गोरेगाव पोलिसांनी भादंविच्या कलम १८८,२६९,२७० सहकलम ५१ (ब) आपत्ती व्यवस्थापन अधिनियम २००५ सहकलम २,३,४ साथीचे रोग अधिनियम १८९७ अन्वये गुन्हा नोंद केला. यासंदर्भात जिल्हा शल्य चिकित्सक यांनी १५ मे रोजी पत्र काढून नायरा मल्टिस्पेशालिटी हॉस्पिटलची मान्यता रद्द केली आहे.