३७ जणांचे नमुने पाठविले तपासणीसाठी

देशात आणि राज्यात कोरोनाचा प्रादुर्भाव झपाट्याने वाढत आहे. त्यामुळे शासन आणि प्रशासनाकडून प्रादुर्भाव टाळण्यासाठी उपाययोजना राबविल्या जात आहे. मात्र दिल्ली येथील एका धार्मिक समाजाच्या कार्यक्रमात सहभागी झालेल्या काही जणांना कोरोनाची लागण झाल्याचे वैद्यकीय तपासणी अहवालानंतर स्पष्ट झाले. त्यामुळे देशभर खळबळ उडाली आहे. याच पार्श्वभूमीवर सरकारने सर्व जिल्हा प्रशासनाला खबरदारीच्या उपाययोजना राबविण्याचे निर्देश दिले.

ठळक मुद्देदिल्लीहून प्रवास केलेल्या १४ जणांचा समावेश : रिपोर्टकडे लागले लक्ष, सर्वांना केले रुग्णालयात क्वारंटाईन

लोकमत न्यूज नेटवर्क
गोंदिया : दिल्ली येथे एका धार्मिक कार्यक्रमात सहभागी झालेल्यांपैकी काही जणांना कोरोनाची लागण झाली असल्याचे स्पष्ट झाले. यानंतर देशभर हाय अर्लट देण्यात आले आहे. या कार्यक्रमाच्या कालावधीत दिल्ली निजामुद्दीन येथे गेलेल्या जिल्ह्यातील नागरिकांची शोध मोहीम सुरू करण्यात आली आहे. यापैकी दिल्ली येथे गेलेल्या १४ जणांची ओळख झाली आहे. तर गोंदिया येथील कोरोना बाधीत युवकाच्या संपर्कात आलेल्या २३ अशा एकूण ३७ जणांना आयुर्वेदीक महाविद्यालयातील विलगीकरण कक्षात क्वारंटाईन करुन ठेवण्यात आले. गुरूवारी (दि.२) या सर्वांचे नमुने घेऊन तपासणीसाठी नागपूर येथे पाठविण्यात आले.
देशात आणि राज्यात कोरोनाचा प्रादुर्भाव झपाट्याने वाढत आहे. त्यामुळे शासन आणि प्रशासनाकडून प्रादुर्भाव टाळण्यासाठी उपाययोजना राबविल्या जात आहे. मात्र दिल्ली येथील एका धार्मिक समाजाच्या कार्यक्रमात सहभागी झालेल्या काही जणांना कोरोनाची लागण झाल्याचे वैद्यकीय तपासणी अहवालानंतर स्पष्ट झाले. त्यामुळे देशभर खळबळ उडाली आहे. याच पार्श्वभूमीवर सरकारने सर्व जिल्हा प्रशासनाला खबरदारीच्या उपाययोजना राबविण्याचे निर्देश दिले. या कार्यक्रमाच्या कालावधीत जिल्ह्यातून किती नागरिक दिल्ली निजामुद्दीन येथे गेले होते याचा शोध घेऊन त्यांना क्वारंटाईन करण्याच्या सूचना बुधवारी केल्या. त्याच अनुषंगाने जिल्हा प्रशासनाने अशांची शोध मोहीम बुधवारपासून सुरू केली आहे. या कार्यक्रमाच्या कालावधीत दिल्ली येथे प्रवास केलेल्या एकूण १४ जणांची ओळख पटली असून या सर्वांना कुडवा परिसरातील आयुर्वेदिक महाविद्यालयातील विलगीकरण कक्षात ठेवण्यात आले आहे.
शहरातील गणेश नगर परिसरात एक कोरोना बाधीत रुग्ण आढळल्यानंतर त्याच्या संपर्कात आलेल्या एकूण २३ जणांना सुध्दा रूग्णालयात क्वारंटाईन करुन ठेवण्यात आले आहे. अशा एकूण ३७ जणांचे नमुने कोरोना संसर्गाच्या अनुषंगाने गुरूवारी नागपूर येथील प्रयोगशाळेत तपासणीसाठी पाठविण्यात आले आहे.
या सर्वांचा अहवाल शुक्रवारी प्राप्त होणार असल्याचे आरोग्य विभागाच्या अधिकाऱ्यांनी सांगितले.

पीएनबीचे ते कर्मचारी झाले होम क्वारंटाईन
गोंदिया येथील कोरोना बाधित आढळलेला रुग्ण येथील पीएनबी बँकेत गेला असल्याचे स्पष्ट झाले होते.त्यामुळे बँकेच्या अधिकारी आणि कर्मचाऱ्यांनी स्वत:ची आरोग्य तपासणी करुन घेत स्वत:च होम क्वारंटाईन करुन घेतले आहे. त्यामुळे जयस्तंभ चौकातील पीएनबीची शाखा १३ एप्रिलपर्यंत बंद ठेवण्यात आली आहे.
दिल्लीहून प्रवास केलेल्यांचा शोध सुरू
दिल्लीतील एका धार्मिक कार्यक्रमात सहभागी झालेले काही नागरिक विविध ठिकाणी रेल्वे गाड्यांनी परत गेले. त्यामुळे या नागरिकांच्या संपर्कात काही प्रवाशी आल्याची शक्यता नाकारता येत नाही.त्यामुळे खबरदारीचा उपाय म्हणून या कालावधीत रेल्वेने प्रवास केलेल्या जिल्ह्यातील अशा प्रवाशांची शोधमोहिम सुरू करण्यात आली असल्याची माहिती जिल्हा प्रशासनाने दिली.
जिल्ह्यात कोरोनाचा नवीन रुग्ण नाही
शहरातील गणेश परिसरातील एका युवकाला कोरोनाची लागण झाल्याचे २७ मार्चला स्पष्ट झाले होते.त्यानंतर आरोग्य विभाग आणि जिल्हा प्रशासनाने जिल्ह्यात युद्ध पातळीवर शोधमोहिम राबविली. तसेच प्रतिबंधात्मक उपाययोजना राबविल्या.त्यामुळेच जिल्ह्यात तेव्हापासून एकही कोरोनाचा नवीन रुग्ण आढळला नाही.