मोकाट जनावरांचा मुख्य रस्त्यावर बैठा सत्याग्रह ()

बोंडगावदेवी : तालुक्याचे मुख्य ठिकाण, व्यापार नगरी असलेल्या अर्जुनी मोरगाव शहराच्या रहदारीच्या मार्गावर सद्य:स्थितीत मोकाट जनावरांचा ठिय्या राहत असल्याने वाहतुकीची कोंडी होते. मात्र याकडे नगरपंचायतचे दुर्लक्ष होत असल्याने अपघाताची शक्यता नाकारता येत नाही.

अर्जुनी मोरगाव हे तालुक्याचे ठिकाण असल्याने लोकांची सतत वर्दळ असते. शहरातील मुख्य चौकातील ऐन वर्दळीच्या रस्त्यावर मोकाट जनावरे बसून राहतात. या मोकाट जनावरांवर लगाम कधी लावले गेल्याचे ऐकिवात नाही. मुख्य रस्त्यावर जनावरे इतरत्र भटकत असल्याने रहदारीस अडथळा निर्माण होतो. नगरपंचायतने मोकाट जनावरांचा कायमचा बंदोबस्त करण्याची मागणी नागरिकांकडून केली जात आहे.

बॉक्स....

..अन्यथा फौजदारी गुन्हे

जनावरे रस्त्यावर बसून राहत असल्याने रहदारीस अडथळा निर्माण होतो. मोकाट जनावरांच्या बस्तानापायी कधीकाळी अपघात होण्याची शक्यता नाकारता येत नाही. यापुढे मुख्य रस्त्यावर मोकाट जनावरे आढळल्यास पोलीस विभागाच्या वतीने ताब्यात घेऊन जनावरांच्या मालकांवर फौजदारी गुन्हे दाखल करण्यात येतील, असे पोलीस निरीक्षक महादेव तोदले यांनी कळविले आहे.