जिल्ह्यातील ५० गावांत होणार सांडपाणी व घनकचरा व्यवस्थापन ()

गोंदिया : गावातील सांडपाणी व घनकचरा व्यवस्थापन करून गावातील रोगराई दूर करण्याचा उपक्रम आता सुरू करण्यात आला आहे. स्वच्छ भारत मिशन ग्रामीण टप्पा-२ अंतर्गत सन २०२०-२१च्या वार्षिक कृती आराखड्यात एकूण ८६९ गावांपैकी ५० गावांमध्ये शासनाच्या नवीन धोरणानुसार सांडपाणी व घनकचरा व्यवस्थापनाची कामे हाती घेण्यात आली आहेत.

त्यात आमगाव तालुक्यातील ५, अर्जुनी-मोरगाव ५, देवरी ५, गोंदिया १०, तिरोडा ९, गोरेगाव ७, सडक-अर्जुनी ५, सालेकसा चार अशा एकूण ५० गावांत सांडपाणी व घनकचरा व्यवस्थापन करण्यात येणार आहे. जिल्ह्यातील ७६ ग्रामपंचायतींमध्ये ८१ सार्वजनिक शौचालय बांधकामाचे उद्दिष्ट आहे. सार्वजनिक शौचालय बांधकाम करण्याची प्रक्रिया सुरू करण्याचे निर्देश देण्यात आले आहेत. गोंदिया तालुक्यात ११ सार्वजनिक शौचालय व प्रत्येक तालुक्यात १० असे एकूण ८१ शौचालयांचे बांधकाम करण्यात येणार आहे. या सांडपाणी व घनकचरा व्यवस्थापनासाठी जिल्हा परिषदेचे मुख्य कार्यपालन अधिकारी प्रदीप डांगे, उपमुख्य कार्यकारी अधिकारी राजेश राठोड, कार्यकारी अभियंता चव्हाण यांनी पुढाकार घेतला आहे.