भरधाव ट्रकची पोलिसांच्या वाहनाला धडक; एक ठार, दोन कर्मचारी बचावले

मासुकसा घाटाजवळील घटना

गोंदिया : देवरी पोलिस ठाण्यांतर्गत येणाऱ्या मासुलकसा घाटावर भरधाव ट्रकने राष्ट्रीय महामार्ग पोलिसांच्या वाहनाला जबर धडक दिल्याने एक पोलिस कर्मचारी ठार झाल्याची घटना ३ जुलै रोजी सायंकाळी ५ वाजता घडली. मनीष बहेलीया (३२) असे मृतक पोलिस कर्मचाऱ्याचे नाव आहे.

देवरी पोलिस ठाण्यांतर्गत येणाऱ्या मासुलकसा घाटावर दररोज वाहतुकीची कोंडी होते. ही वाहतुकीची कोंडी सोडविण्यासाठी महामार्ग पोलिस केंद्र डोंगरगाव कॅम्प डुग्गीपारचे महामार्ग पोलिस उपनिरीक्षक दिनेश लिल्हारे, वाहन चालक योगेश बनोटे व मनीष बहेलीया हे मासुलकसा घाटाकडे पोलिस वाहनाने जात होते. दरम्यान, पाईप घेऊन जाणार ट्रॅकच्या (क्रमांक सीजी ०८-एके १४०२) चालकाने मद्याच्या धुंदीत भरधाव वेगात ट्रक चालवून महामार्ग वाहतूक पोलिसांच्या गाडीला (क्रमांक एमएच १२-आरटी ९६२५) जोरदार धडक दिली. या धडकेत वाहनात मागे बसलेले पोलिस कर्मचारी मनीष बहेलीया (३२) हे गंभीर जखमी झाले. त्यांना उपचारासाठी गोंदियाच्या एका खासगी रुग्णालयात आणले असता, डॉक्टरांनी त्यांना मृत घोषित केले. या घटनेसंदर्भात देवरी पोलिस गुन्हा दाखल केला आहे.

चार वाहनांना धडक; चालक होता मद्याच्या धुंदीत

मद्याच्या धुंदीत ट्रक चालक रायपूरकडून नागपूरकडे लोखंडी पाईप घेऊन जात होता. ट्रक चालकाने मद्याच्या धुंदीत चार वाहनांना धडक दिली. पोलिस वाहनाला धडक दिल्याने एक पोलिस ठार झाला. पोलिस वाहनानंतर एका ट्रॅव्हल्सला धडक दिली. ट्रॅव्हल्सच्या काचा फुटल्या. त्यानंतर स्काॅर्पिओ वाहनाला धडक दिली. शेवटी एका ट्रकला धडक दिली. या धडकेत चारही वाहनांचे नुकसान झाले. देवरी पोलिसांनी ट्रक चालकाला ताब्यात घेतले आहे.