आमगाव स्थानकावर सुपरफास्ट गाड्यांचा थांबा द्या

आमगाव : येथील रेल्वेस्थानकावर सुपरफास्ट एक्स्प्रेस गाड्यांचा थांबा द्यावा, अशी मागणी झोन सदस्य रितेश अग्रवाल यांनी मध्य रेल्वे व्यवस्थापक मनिंदर उप्पल व डीसीएम विकास कश्यप यांच्यासोबत ऑनलाईन चर्चेतून केली आहे.

दक्षिण-पूर्व-मध्य रेल्वे नागपूरद्वारा ३० जुलै ऑनलाईन सभा घेण्यात आली. या सभेत आमगाव रेल्वेस्थानकाबाबत चर्चा करण्यात आली. चर्चेत मध्य रेल्वे व्यवस्थापक उप्पल व डीसीएम कश्यप यांच्यासोबत झोन सदस्य अग्रवाल उपस्थित होते. यावेळी अग्रवाल यांनी आमगाव स्थानकावरून प्रवास करणाऱ्या प्रवाशांकरिता जनशताब्दी एक्स्प्रेस व आझाद हिंद एक्स्प्रेसला थांबा मिळावा तसेच रेल्वे स्थानकाच्या सुसज्जतेची मागणी निवेदनातून केली. दोन्ही ट्रेन हे आमगाव स्थानकावरून जातात व या गाड्यांचा थांबा मिळाला तर प्रवाशांना गोंदियाला जावे लागणार नाही. प्रवासांच्या सुविधेसाठी रेल्वे विभागाने ही मागणी पूर्ण करावी, असे निवेदनात म्हटले आहे.