गॅस सिलिंडर चोरी प्रकरणातील संशयित आरोपीला अटक

तिरोडा : येथील गॅस वितरकाच्या खैरबोडी येथील गुदामातून भरलेले ३३ व रिकामे ९७ सिलिंडर अज्ञात चोरट्यांनी १५ मे रोजी रात्री लंपास केले होते. या घटनेची नोंद तिरोडा पोलीस ठाण्यात करण्यात आली. दरम्यान, पोलिसांनी शोधचक्र फिरवून चोरी प्रकरणातील एका संशयित आरोपीला अटक केली आहे. त्याच्याकडून १२ सिलिंडर हस्तगत करण्यात आले आहेत, तर उर्वरित दोन आरोपींचा शोध सुरू आहे. शुभम उर्फ गोली रतिराम आंबेडारे (२३, रा. पागा मोहल्ला, तिरोडा) असे अटक करण्यात आलेल्या संशयित आरोपीचे नाव आहे.

येथील सांकेशा गॅस वितरकाचे खैरबोडी येथे गुदाम आहे. १५ मे रोजी रात्री गोदामात ठेवलेले ३३ भरलेले व ९७ रिकामे असे एकूण १३० घरगुती वापराचे गॅस सिलिंडर चोरी झाल्याची तक्रार तिरोडा पोलीस ठाण्यात करण्यात आली होती. या प्रकरणात एकूण दोन लाख १७ हजार ४७४ रूपये किंमतीचा माल चोरीस गेला होता. या प्रकरणाची गांभीर्याने दखल घेत तिरोडा पोलिसांनी तपास करून संशयित शुभम आंबेडारे याला ताब्यात घेतले. त्याची कसून विचारपूस केली असता गुदामातून सिलिंडर चोरी केल्याचे उघडकीस आले. दरम्यान, त्याच्याकडून १२ सिलिंडरही हस्तगत करण्यात आले. या प्रकरणात आणखी दोन आरोपींचा समावेश असल्याची माहिती अटक करण्यात आलेल्या आरोपीकडून समोर आली आहे. त्यामुळे पोलीस त्या आरोपींचा शोध घेत आहे.