पैशाच्या वादातून मित्रांनीच केला मित्राचा खून; तिघांना अटक

मृताला आरोपींनी अनेकदा मद्याच्या धुंदीत मारहाण केली होती. त्यांच्यात पैशाच्या देवाण-घेवाणीवरूनही वाद झाला होता.

ठळक मुद्देकुऱ्हाडीचे घाव घालून केले ठार १ एप्रिलपर्यंत पोलीस कोठडी

गोंदिया : पैशांच्या देवाण-घेवाणीवरून झालेल्या वादात तीन मित्रांनी एका मित्राचा कुऱ्हाडीने घाव घालून २७ मार्चच्या मध्यरात्री खून केला. या प्रकरणात रामनगर पोलिसांनी २८ मार्चच्या रात्री दहा वाजता तीन आरोपींना अटक केली आहे.

रोहित ऊर्फ राहुल ऊर्फ अंडा डायमंड डोंगरे (वय १८, रा. कटंगीटोला) या मृताला आरोपींनी अनेकदा मद्याच्या धुंदीत मारहाण केली होती. त्यांच्यात पैशाच्या देवाण-घेवाणीवरूनही वाद झाला होता. शहरातील अंगूर बगीचा परिसरातील टेंभरे किराणाजवळील मोकळ्या जागेत आरोपी योगेश ऊर्फ शेरू मारोती बोरकर (२६), विशाल हरिभाऊ बुढेकर (२६) व दुर्गेश लक्ष्मण विठोले (२५, तिन्ही रा. अंगुर बगीचा कटंगी) या तिघांनी त्याला मारले. आरोपींनी रोहित डोंगरेवर कुऱ्हाड व फरशीने हल्ला करून खून केला.

रोहितची आई कविता डायमंड डोंगरे (४५) यांच्या तक्रारीवरून रामनगर पोलिसांनी भादंविचे कलम ३०२ अंतर्गत गुन्हा दाखल केला आहे. आरोपींना २८ मार्चच्या रात्री १० वाजता अटक करण्यात आली. आरोपींना जिल्हा सत्र न्यायालयात हजर करण्यात आले होते. न्यायालयाने आरोपींना १ एप्रिलपर्यंत पोलीस कोठडी सुनावली आहे. तपास सहायक पोलीस निरीक्षक संजयकुमार सोने करीत आहेत.