अनैतिक संबंधांचा संशय, युवकाची कुऱ्हाडीने वार करून हत्या; विरूळ परिसरात खळबळ

आरोपीला ठोकल्या बेड्या

विरूळ (आकाजी) : घरी नेहमी जाणे-येणे असलेल्या युवकाचे आपल्या पत्नीसोबत अनैतिक संबंध असल्याचा संशय मनात घर करून बसला. यातूनच पतीने युवकावर कुऱ्हाडीने वार करून त्याची हत्या केल्याची घटना गुरुवारी रात्री १० च्या सुमारास रामपूर गावात घडली. या घटनेने सर्वत्र खळबळ उडाली असून पोलिसांनी अवघ्या काही तासांतच आरोपीला बेड्या ठोकल्या.

सौरभ सुरेश मोरस्कर (२७), रा. रामपूर असे मृताचे नाव आहे. सौरभचे गावातील जयराम शिरभाते यांच्याकडे नेहमी जाणे-येणे होते. यातूनच सौरभचे आपल्या पत्नीशी अनैतिक संबंध असल्याचा संशय जयरामला आला. यातूनच जयरामने वचपा काढण्यासाठी गुरुवारी रात्री १० वाजेच्या सुमारास सौरभवर कुऱ्हाडीने घाव घातले. गंभीर जखमी झालेल्या सौरभला उपचाराकरिता पुलगावच्या रुग्णालयात उपचारासाठी नेत असताना त्याचा वाटेतच मृत्यू झाला. घटनेची माहिती मिळताच पुलगाव पोलिसांनी तातडीने घटनास्थळ गाठून आरोपी जयराम शिरभाते याला अटक केली. पुढील तपास पोलिस अधीक्षक नुरूल हसन, उपविभागीय पोलिस अधिकारी पाटील, पुलगावचे पोलिस निरीक्षक शैलेश शेळके यांच्या मार्गदर्शनात पोलिस उपनिरीक्षक पल्लवी कळमकर व त्यांची चमू करीत आहे.

पोलिस अधीक्षकांची घटनास्थळी धाव

जिल्ह्यामध्ये ग्रामपंचायतीच्या निवडणुकीचा धुमशान सुरू आहे. अशातच या हत्येच्या घटनेने खळबळ उडवून दिली. या घटनेची गांभीर्याने दखल घेऊन पोलिस अधीक्षक नुरूल हसन यांनी शुक्रवारी सकाळी स्वत: घटनास्थळ गाठून पाहणी केली. यावेळी पुलगाव पोलिसांचीही उपस्थिती होती.