हिंगोलीत १० वर्षीय मुलीवर अत्याचार ; आरोपी ताब्यात

हिंगोली शहरातील मस्तानशहा नगरातील १० वर्षीय मुलगी व तिची मैत्रीण शहरातील एनटीसी भागात आल्या होत्या. यावेळी तुम्हाला नवीन कपडे व ५०० रूपये देतो, असे म्हणून यश आंबादास आठवले (रा. देवडा नगर हिंगोली) याने दोघींना दुचाकीवर बसवून खटकाळी बायपास भागात नेले. त्यानंतर हनुमान नगर, आझम कॉलनीच्या समोर बांधकाम सुरू असलेल्या इमारतीत नेले. यावेळी १० वर्षीय मुलीचे केस लाेचून गालात थापडाने मारहाण करीत तिच्यासोबत अनैसर्गिक कृत्य केले. ही घटना मुलीने घरी सांगितली. त्यानंतर मुलीच्या पित्याच्या फिर्यादीवरून यश आठवले याच्याविरुद्ध हिंगोली शहर पोलीस ठाण्यात रात्री उशिरा गुन्हा नोंद झाला आहे. तपास सहायक पोलीस निरीक्षक शहारे करीत आहेत.

पोलिसांच्या निगराणीखाली आरोपी रूग्णालयात

घटनेची माहिती समजताच पोलीस अधीक्षक राकेश कलासागर, अप्पर पोलीस अधीक्षक यशवंत काळे, सहायक पोलीस अधीक्षक यतीश देशमुख यांनी आरोपीला ताब्यात घेण्याच्या सूचना ठाणेदाराला दिल्या होत्या. त्यानुसार पोलीस निरीक्षक पंडित कच्छवे यांनी पोहेकॉ शेख शकील, सुधीर ढेंबरे, शेख मुजीब, उमेश जाधव, असलम गारवे, गणेश लेकुळे यांना सोबत घेत आरोपीचा शोध सुरू केला. त्यांनी काही तासातच आरोपीचा शोध घेऊन त्यास ताब्यात घेतले. दरम्यान, आरोपीस पोलिसांच्या निगराणीखाली जिल्हा रूग्णालयात तपासणीसाठी दाखल केले आहे.