रस्त्यावर उभ्या ट्रकवर भरधाव टेम्पो धडकला; चार जणांचा मृत्यू, दीडशे मेंढ्याही दगावल्या

आज पहाटे ४ वाजता हिंगोली - नांदेड महामार्गावर झाला भीषण अपघात

- शेख इलियास

कळमनुरी: हिंगोली-नांदेड महामार्गावर माळेगावजवळ उभ्या ट्रकवर आज पहाटे 4 वाजता भरधाव टेम्पो धडकून भीषण अपघात झाला. यात टेम्पो मधील चार जणांचा मृत्यू झाला असून शंभर ते दीडशे मेंढ्याही दगावल्या आहेत. मृतांची नावे अद्याप स्पष्ट झाली नाहीत.

याबाबत प्राथमिक माहिती अशी की, माळेगावजवळ रस्त्यावर एक ट्रक ( क्रमांक एम. एच.18 बीए-9716) उभा करण्यात आला होता. दरम्यान, कळमनुरीहून एक टेम्पो ( क्र.एच. आर.55 एजे-3111) नांदेडकडे मेंढ्या घेऊन जात होता. पहाटे चार वाजेच्या सुमारास भरधाव टेम्पो ट्रकवर पाठीमागून धडकला. धडक एवढी जोरदार होती की टेम्पो चकनाचुर झाला. अपघाताची माहिती मिळताच वाहतूक महामार्गाचे पोलीस उपनिरीक्षक उमर शेख गजानन आगलावे, वसीम शेख, रामेश्वर लोखंडे , बळीराम शिंदे, नवनाथ शिंदे आदींनी घटनास्थळी धाव घेतली.

टेम्पोमधील  4 जखमींना बाहेर काढून येथील जिल्हा रुग्णाला दाखल केले. तिघा जणांना तपासून वैद्यकीय अधिकाऱ्यांनी मृत घोषित केले. तर एकाची प्रकृती गंभीर असल्यामुळे त्याला पुढील उपचारासाठी नांदेड येथे हलविण्यात आले. नांदेड येथे उपचार सुरू असताना त्याचाही मृत्यू झाला. दरम्यान, टेम्पोमधील शंभर ते दीडशे मेंढयाही या भीषण अपघातात दगावल्या आहेत.