मित्राच्या लग्नासाठी जाणाऱ्या दोघा भावांचा अपघात; एकाचा जागीच मृत्यू

नांदेड ते वारंगा मार्गावर जामगव्हाण पाटीजवळ झाला अपघात

हिंगोली: मित्राच्या लग्नासाठी पुण्याहून गावाकडे आलेल्या युवकाचा नांदेड ते हिंगोली राष्ट्रीय महामार्गावरील जामगव्हाण  पाटीजवळ  (ता. कळमनुरी) अपघातात मृत्यू झाला. ही घटना १४ एप्रिल रोजी घडली.

नांदेड ते हिंगोली राष्ट्रीय महामार्गावरील जामगव्हाण पाटीजवळ पाठीमागून येणाऱ्या ट्रकने मोटारसायकलला ओव्हरटेक केली. यादरम्यान ट्रकने मोटारसायकलला धडक दिली. या अपघातात अविनाश बापूराव जाधव (रा. पेवा, ता. हदगाव, जि. नांदेड) येथील युवक जागीच ठार झाला तर एकजण जखमी झाल्याची घटना शुक्रवारी सकाळी साडेअकरा वाजेदरम्यान घडली. 

अविनाश जाधव व देवानंद संजय जाधव दोघे चुलतभाऊ पुण्याला खासगी रुग्णालयात काम करीत होते. गावाकडे मित्राच्या लग्नासाठी मोटारसायकल (क्र. एमएच १४ केएम ३१५९) वरून गावाकडे नांदेड ते वारंगा मार्गाने जात असताना जामगव्हाण पाटीजवळ पाठीमागून येणाऱ्या ट्रक क्रमांक (जीजे ०३-बीडब्ल्यू-८५३१) ने मोटारसायकलला ओव्हरटेक करताना धडक दिली. त्यामुळे अविनाश जाधव हा युवक जागीच ठार झाला असून, देवानंद जाधव हा जखमी झाला.

अपघाताची माहिती मिळताच जमादार शेख बाबर, प्रभाकर भोंग यांनी घटनास्थळी भेट दिली. सदरील ट्रक अपघात स्थळावरून जात असताना पोलिसांनी पाठलाग करून डोंगरगावजवळ ट्रक पकडला. डोंगरकडा प्राथमिक आरोग्य केंद्रात वैद्यकीय अधिकारी डॉ. विनोद आतकुरकर, कलीम, प्रशांत स्वामी यांनी शवविच्छेदन केले.