दरोड्याच्या तयारीत असलेल्या टोळीस पकडले

वसमत : दरोडा घालण्याच्या उद्देशाने दबा धरून बसलेल्या टोळीस वसमत शहर पोलिसांनी पकडले. धारदार शस्त्रांसह पाच जण जेरबंंद केले असून, एक फरार आहे. वसमत शहर पोलीस ठाण्यात याप्रकरणी गुन्हा नोंदविण्यात आला आहे.

वसमत शहर पोलीस ठाण्याचे पोलीस निरीक्षक शिवाजी गुरमे व त्यांचे पथक शनिवारी रात्री गस्तीवर असताना दगडगाव रस्त्यावरील रेल्वे पुलाखाली त्यांना हटकले असता, उडवाउडवीची उतरे देत होते. पोलिसांनी झडती घेतली असता, त्यांच्याकडे दोन तलवार, रॉड अशी घातक धारदार शस्त्रे सापडल्याने त्यांना पोलिसांनी अटक केली. पोलीस निरीक्षक शिवाजी गुरमे यांच्या तक्रारीवरून आराेपी शोएबखाँ नसीरखाँ पठाण, संतोष कांता, खाटीकमारे (रा. जिंतूर), नागोराव दादाराव गायकवाड, शेख पाशा शेख युसूफ (रा. वसमत), एक १४ वर्षीय मुलगा (रा. जिंतूर) व घटनास्थळावरून फरार झालेला सय्यद जमील सयद जाफर (रा. वसमत) या सहा जणांविरूद्ध गुन्हा नोंदविला आहे.

या प्रकरणाचा तपास सपोनि श्रीदेवी पाटील या करीत आहेत. ही कारवाई पोनि शिवाजी गुरमे, जमादार चव्हाण, भगीरथ सवंडकर, शेख हकीम, सोनटक्के यांसह कर्मचाऱ्यांनी केली. धारदार शस्त्रासह पकडण्यात आलेले आरोपी दरोडा घालण्याच्या तयारीत होते. ही टोळी पकडण्यात आल्याने अनर्थ टळला. यांना पकडण्यात आल्याने अनेक गुन्हे उघडकीस येण्याची शक्यता असल्याचे पोनि गुरमे यांनी सांगितले.