ब्राह्मणवाडा येथे दोन गटांत हाणामारी; एकाचा उपचारादरम्यान मृत्यू

प्रकृती चिंताजनक बनल्याने नांदेड पाठविण्यात आले. परंतु उपचारादरम्यान त्यांचा मृत्यू झाला.

विजय पाटील
 

हिंगोली: सेनगाव तालुक्यातील ब्राह्मणवाडा येथे ७ ऑक्टोबर रोजी दोन गटांत हाणामारी झाली. या घटनेत बाळू नथू राठोड यांना गंभीर मार लागला. यानंतर त्यांना प्रथम हिंगोली येथील शासकीय रुग्णालयात दाखल केले. परंतु प्रकृती चिंताजनक बनल्याने नांदेड पाठविण्यात आले. परंतु उपचारादरम्यान त्यांचा मृत्यू झाला.

ब्राह्मणवाडा येथे ७ ऑक्टोबर रोजी सायंकाळी ६ वाजेदरम्यान दोन गटांत हाणामारी झाली. या हाणामारीत बाळू नथू राठोड यांना गंभीर मार लागला. त्यामुळे उपस्थित लोकांनी त्यांना प्रथम हिंगोली येथील शासकीय रुग्णालयात दाखल केले. परंतु बाळू राठोड यांची प्रकृती अधिकच चिंताजनक बनली. त्यामुळे जिल्हा रुग्णालयातील डॉक्टरांनी प्रथमोचार करून नांदेडच्या शासकीय रुग्णालयात नेण्याचा सल्ला दिला. नातेवाइकांनी लगेच गंभीर जखमीस नांदेडच्या विष्णूपुरी येथील सरकारी दवाखान्यात दाखल केले.

परंतु उपचार सुरू असताना ८ ऑक्टोबर रोजी पहाटे ५ वाजेदरम्यान बाळू राठोड यांचा मृत्यू झाला. या घटनेतील प्रेमदास नथू राठोड, रोहिदास नथू राठोड व आई कमलाबाई नथू राठोड यांच्यावर हिंगोली येथील शासकीय रुग्णालयात उपचार सुरू आहेत. या घटनेची माहिती कळताच गोरेगाव पोलिस ठाण्यांतर्गत असलेल्या कनेरगाव पोलिस उपनिरीक्षक संतोष आघाव व पोलिस कर्मचारी घटनास्थळी पोहोचले. या प्रकरणी रात्री उशिरापर्यंत गुन्हा नोंद करण्याची प्रक्रिया सुरू होती. सदर घटनेतील आरोपींना लवकरच अटक केली जाईल, असे पोलिसांनी सांगितले.