खासदारांच्या बैठकीनंतरही पीककर्ज वाटप ४ टक्केच वाढले

हिंगोली जिल्ह्यात पीककर्ज वाटपाचा टक्का वाढण्यासाठी खा.पाटील यांनी जिल्हा कचेरीत बैठक घेतली होती. यात त्यांच्यासह जिल्हाधिकारी रुचेश जयवंशी यांनी बँकांना कडक सूचना दिल्या होत्या. त्यानंतर पीककर्ज वाटपासाठी गावनिहाय मेळाव्यांचे नियोजन करण्याचे ठरले. त्याचा कार्यक्रम महसूल प्रशासनाला सादर करायचा होता. मात्र बँकांना याचा विसर पडला. शिवाय अग्रणी बँकेच्या व्यवस्थापकांनी तर कायमचेच झोपेचे सोंग घेतलेले असल्याने त्यांना एकही बँक जुमानत नाही. ते ज्या स्टेट बँक ऑफ इंडियाचे प्रतिनिधीत्व करतात तीच ११.०७ टक्क्यांवर अडकलेली आहे. बँक महाराष्ट्र २० टक्के तर सेंट्रल बॅक ऑफ इंडियाने १९.१२ टक्के असे सर्वाधिक वाटप केले आहे. यंदा महाराष्ट्र ग्रामीण बँकह ९.२५ टक्क्यांवरच अडकली. जिल्हा बँकही ३४.४९ टक्क्यांच्या पुढे सरकायला तयार नाही. त्यामुळे या बैठकीचा नेमका काय परिणाम बँकांवर झाला, हे कळायला मार्ग नाही.

दरवर्षीचीच बोंब

जिल्ह्यात पीककर्ज वाटपासाठी लोकप्रतिनिधी, अधिकारी पोटतिडकीने बैठक घेवून सूचना देतात. मात्र बँका त्यांना सोयीस्करपणे केराची टोपली दाखवितात. त्यामुळे ही दरवर्षीचीच बोंब बनली आहे. यावर लोकप्रतिनिधी व प्रशासनालाही मात्रा सापडत नाही. एसएलबीसीकडे अशा बँकांचा अहवाल पाठविला जाईल, असा इशारा तेवढा दिला जातो. मात्र कधीच तो जात नाही. त्याचा गैरफायदा घेतला जात आहे.

कर्जमाफीनंतरही २५ हजार शेतकरी वाऱ्यावर

हिंगोली जिल्ह्यातील २५ हजार ६७६ शेतकऱ्यांना गतवर्षी कर्जमाफी झाल्यानंतरही संबंधित २० बँकांकडून त्यांना पुन्हा कर्ज मिळाले नव्हते. ते यंदा देण्यासाठी सांगण्यात आले होते. मात्र या शेतकऱ्यांना अजूनही बँका दारात उभे करायला तयार नाहीत. आतापर्यंत जिल्ह्यात २८ हजार ६३० शेतकऱ्यांना १४१ कोटी रुपयांचे पीककर्ज वाटप झाले.

बँकनिहाय झालेले कर्ज वाटप

बँक शेतकरी वाटप कर्ज उद्दिष्टाशी प्रमाण

इंडियन बॅक २८ २६.२८ ११.७७ टक्के

बडोदा बँक ११८ २१०.९५ ९.९२

बँक ऑफ इंडिया ४०२ ४२८.६३ १०.४२

बँक ऑफ महाराष्ट्र ६५० ५९०.०३ २०.८०

कॅनरा बँक ९ १०.० ०.७१

सेंट्रल बँक इंडिया १७४ १५५.८ १९.१२

पंजाब नॅशनल १७५ १४९.४ १४.१४

एसबीआय ४८१३ ४४४६ ११.०७

युको बँक ३२ ४०.३० १४.३९

युनियन बँक २७१ २४०.३ ६.८६

ॲक्सिस बँक १२ २५ २.६३

एचडीएफसी २१३ ४०६.१ ८.१२

आयसीआयसीआय १७८ २९० ७.३८

आयडीबीआय ६० ७५ १०.४२

महाराष्ट्र ग्रामीण २०६३ १५५७ ९.२५

मध्यवर्ती बँक १९४३२ ५४७६ ३४.४९