बोगस मतदान करण्याचा प्रयत्न करणाऱ्यावर गुन्हा दाखल

लोकमत न्यूज नेटवर्क

आखाडा बाळापूर : एकाच मतदार यादीत दोनवेळा नाव असल्याने एकच व्यक्ती दुसऱ्यांदा मतदान करण्यासाठी गेल्याच्या आरोपावरून आखाडा बाळापूर पोलीस ठाण्यात एकाविरुद्ध गुन्हा दाखल करण्यात आला आहे. या प्रकरणामुळे बोगस मतदान व सदोष मतदार याद्यांसह वेगळ्याच प्रश्नांना वाचा फुटली आहे.

आखाडा बाळापूर येथे १५ जानेवारी रोजी ग्रामपंचायतीसाठी मतदान प्रक्रिया पार पडली. यावेळी आखाडा बाळापूर येथील जिल्हा परिषदेच्या कन्या शाळेतील मतदान केंद्र क्रमांक ३/४ अ मध्ये एकच नागरिक दुसऱ्यांदा बोगस मतदानासाठी मतदान केंद्रात आल्याचे लक्षात आले. मतदान प्रतिनिधींनी ही बाब मतदान केंद्र अधिकाऱ्यांच्या लक्षात आणून दिली. त्यावेळी मतदार यादीतील मतदान यादी क्रमांक १७२०वर एक वेळा मतदान झाले होते. परंतु, मतदारयादी क्रमांक ९७८ वर सदर व्यक्ती पुन्हा मतदान करण्यासाठी आला. यावेळी आक्षेप नोंदवून या नागरिकावर कारवाई करण्याची मागणी करण्यात आली. ही घटना सायंकाळी पाच वाजण्याच्या सुमारास घडली. मतदान केंद्रावर यामुळे काही काळ गोंधळ झाला. त्यानंतर प्रकरण शांत झाले. परंतु, रात्री उशिरा मतदान केंद्र अधिकारी देवानंद रमेशराव पंडित यांच्या फिर्यादीवरून नागेश संजय बोंढारे याच्याविरुद्ध भारतीय दंड विधानाच्या कलम १७१ (फ) अन्वये गुन्हा दाखल करण्यात आला आहे. या प्रकरणाचा पुढील तपास ठाणेदार रवी हुंडेकर यांच्या मार्गदर्शनाखाली बीट जमादार संजय मार्के करत आहेत. हा गुन्हा मतदान प्रक्रिया संपल्यानंतर उशिरा मध्यरात्री दाखल झाला आहे. एकाच मतदार यादीत दोनवेळा नाव कसे आले? या व्यक्तींवर मतदान करताना आक्षेप नोंदवला असता ‘मी मतदानच केले नाही, माझ्या नावावर कोणीतरी मतदान केले’ असा दावा त्याने केला होता. त्यामुळे शांततेत पार पडलेल्या या मतदान प्रक्रियेत बोगस मतदान झाले की काय? याबाबतही उलटसुलट चर्चा सुरू झाली आहे.