गिरगाव, ग्रा. पं., तिरंगी होण्याची शक्यता

३१ डिसेंबर रोजी अर्जाची छाननी करण्यात आली. ऐन हिवाळ्यात गावगाड्याचे वातावरण चांगलेच तापले आहे. १५ जानेवारी रोजी होत असलेल्या निवडणुकीसाठी आता बैठकांचे सत्र सुरु झाले आहे. इतर पॅनलपेक्षा आपला पॅनल कसा मजबूत असेल यासाठी पॅनलप्रमुख रणनीती आखताना दिसत आहेत. आपल्या पॅनेलचे सर्व उमेदवार कसे निवडून येतील, याची चाचपणी सुरू झाली आहे.

मागील पंचवार्षिकमध्ये निवडणुकीपूर्वी आरक्षण सुटल्याने सरपंचपदाचा उमेदवार पॅनलमधील इतर उमेदवारांचीदेखील रसद पुरवित होता. मात्र, या निवडणुकीत सरपंचपदाचे आरक्षण नंतर काढण्यात येणार असल्याने इच्छुकांनी पॅनलसाठी खर्च करण्यासाठी हात आखडता घेतल्याचे चित्र सध्यातरी पहावयास मिळत आहे.

पूर्वी काढलेले आरक्षण रद्द झाल्याने गुडघ्याला बाशिंग बांधून तयारीला लागलेल्या भावी सरपंचाचा चांगलाच हिरमोड झाला. त्यामुळे ‘कही खुशी , कही गम’ चे चित्र आहे. सर्व इच्छुक पुन्हा तयारीला लागले असून त्यामुऴे प्रत्येक प्रवर्गासाठी आता चुरस निर्माण झाली आहे. त्यासाठी इच्छुकही आपल्या मतांचे समीकरण जुळविण्यात व्यस्त झाले असून आपल्याला किती मते पडतील आणि निवडून येण्यासाठी किती मते लागतील. याबाबत तर्कवितर्क लढविले जात आहेत. भाऊबंदासह मित्रमंडळी आणि नातेवाईकांची मते मोजली जात आहेत.

यंदा होणाऱ्या निवडणुकीत मातब्बर पुढाऱ्यांसमोर तरुणांचे आव्हान असल्यामुळे निवडणूक चुरशीची होणार आहे. त्यामुळे यंदा मतदार कोणाला कौल देणार, याचा निर्णय निकालावर अवलंबून आहे.