उभ्या ट्रकला धडक; चालकाचा मृत्यू

हिंगोली : रस्त्यालगत उभ्या असलेल्या एका ट्रकवर दुसरा भरधाव ट्रक धडकून झालेल्या अपघातात ट्रकचालकाचा मृत्यू झाला. ही घटना कन्हेरगाव ते हिंगोली मार्गावरील एका ढाब्याजवळ २२ सप्टेंबरच्या मध्यरात्री एक वाजण्याच्या सुमारास घडली. या प्रकरणी हिंगोली ग्रामीण पोलीस ठाण्यात नोंद घेण्यात आली आहे.

अकोला येथून केए २५ एए १५३६ क्रमांकाचा ट्रक कन्हेरगाव नाकामार्गे हिंगोलीकडे येत होता. २२ सप्टेंबर रोजी मध्यरात्री एक वाजण्याच्या सुमारास हा ट्रक एका ढाब्याजवळ आला असता चालकाने तो भरधाव व निष्काळजीपणे चालवून महामार्गालगत उभ्या असलेल्या एमएच १२ एफ झेड ९७३९ या ट्रकला जोराची धडक दिली. यात केए २५ एए १५३६ ट्रकचा चालक मस्सा सिंग संता सिंग (रा. कोर्ट टोडरमल, जि. गुरुदासपूर, पंजाब) यांचा मृत्यू झाला. या अपघातात ट्रकच्या समोरील भागाचा चुराडा झाला. तसेच समोरील ट्रकचेही मोठे नुकसान झाले. घटनेची माहिती मिळताच हिंगोली ग्रामीणचे पोलीस निरीक्षक आर. एन. मळघणे, पोलीस उपनिरीक्षक के. डी. पोटे यांनी घटनास्थळी धाव घेत घटनेचा पंचनामा केला. या प्रकरणी क्लिनर गुरपेज सिंग लखविंदर सिंग (रा. टेकरीवाल, जि. गुरुदासपूर, पंजाब) यांच्या फिर्यादीवरून मृत ट्रकचालकाविरुद्ध हिंगोली ग्रामीण पोलीस ठाण्यात गुन्हा नोंद झाला आहे. तपास पोलीस उपनिरीक्षक के. डी. पोटे करीत आहेत.