आत्महत्या कशी करावी? यूट्यूबवर पाहत युवकाची आत्महत्या

पोलिसांनी युवकाचा मोबाईल तपासला असता युट्यूबवर आत्महत्या कशी करावी? कोणत्या प्रकारामुळे विनात्रास मृत्यू येतो? याची पाहणी केल्याचे युट्यूब हिस्ट्रीतून स्पष्ट झाले आहे.

गंगाधर पांडुरंग सितळे -

डोंगरकडा (जि. हिंगोली) - कळमनुरी तालुक्यातील डोंगरकडा येथील १६ वर्षीय बेपत्ता युवकाचा मृतदेह डोंगरकडा उपबाजारपेठेच्या टिनशेडच्या खोलीत गळफास घेतलेल्या स्थितीत १२ ऑक्टोबर रोजी दुपारी आढळून आला. याप्रकरणी आखाडा बाळापूर पोलीस ठाण्यात आकस्मिक मृत्यूची नोंद घेण्याची प्रक्रीया सुरू होती. दरम्यान, पोलिसांनी युवकाचा मोबाईल तपासला असता युट्यूबवर आत्महत्या कशी करावी? कोणत्या प्रकारामुळे विनात्रास मृत्यू येतो? याची पाहणी केल्याचे युट्यूब हिस्ट्रीतून स्पष्ट झाले आहे.

प्रशांत दिगंबर मोरे (वय १६ वर्षे, रा. डोंगरकडा) असे मृतदेह आढळलेल्या युवकाचे नाव आहे. प्रशांत मोरे हा डोंगरकडा येथे एका महाविद्यालयात इयत्ता अकरावी वर्गात शिक्षण घेत होता. मात्र मागील काही दिवसांपासून तो अस्वस्थ होता. २१ सप्टेंबर रोजी सकाळी अकरा वाजल्यापासून तो बेपत्ता झाला होता. याप्रकरणी आखाडा बाळापूर पोलीस ठाण्यात नोंदही घेण्यात आली होती. पोलीस व नातेवाईक त्याच्या शोधात असतानाच बुधवारी दुपारी डोंगरकडा येथील उपबाजारपेठेच्या टिनपत्राच्या खोलीत प्रशांतचा मृतदेह आढळून आला. घटनेची माहिती मिळाल्यानंतर सहाय्यक पोलीस निरीक्षक पंढरीनाथ बोधनापोड, उपनिरीक्षक शिवाजी बोंडले, जमादार शेख बाबर, सय्यद शाहेद, प्रभाकर भोंग, अमोल अडकिने यांच्या पथकाने घटनास्थळी धाव घेतली. तपासात सदर मृतदेह प्रशांत मोरे याचा असल्याचे स्पष्ट झाले. यानंतर उत्तरीय तपासणीसाठी मृतदेह डोंगरकडा येथील प्राथमिक आरोग्य केंद्रात दाखल करण्यात आला. वैद्यकीय अधिकारी डॉ. विनोद आतकुरकर, प्रशांत स्वामी, बळीराम वाघमारे यांनी शवविच्छेदन केले.
आत्महत्या कशी करावी? युट्यूबवर केले सर्च

दरम्यान, प्रशांत याने घर सोडण्यापूर्वी मोबाईल घरीच ठेवला होता. बेपत्ता झाल्यानंतर पोलिसांनी त्याच्या मोबाईलची तपासणी केली असता युट्यूबवर आत्महत्या कशी करावी? कोणत्या प्रकारे आत्महत्या केल्याने त्रास कमी होतो? आदी माहिती सर्च केल्याचे पोलिसांना आढळले. त्यावरून पोलीस तपास करीत आहेत.