लाईक, शेअर, फॉरवर्ड जरा जपून; खावी लागू शकते जेलची हवा !

लोकमत न्यूज नेटवर्क

हिंगोली : अनेकजण व्यक्त होण्यासाठी सोशल मीडियाचा वापर करतात. मात्र, कोणत्याही पोस्टला लाईक, शेअर अथवा फॉरवर्ड करणे अंगलट येऊ शकते.

शांतता बिघडवणाऱ्या, जातीय तेढ निर्माण करणाऱ्या पोस्टला तुम्ही कळत-नकळत लाईक, शेअर आणि फॉरवर्ड केले तर तुम्हाला जेलची हवाही खावी लागण्याची शक्यता आहे. त्यामुळे कोणतीही पोस्ट वाचून तिची योग्यता आणि समाजावर होणारे परिणाम लक्षात घेणे आवश्यक आहे.

प्रत्येकाकडे स्मार्टफोन आला असून, व्हॉट्सॲप, फेसबुक, ट्विटर, इन्स्टाग्राम आदी सोशल मीडियाचा वापर वाढला आहे. यातील काहीजण वेळ घालविण्यासाठी, व्यक्त होण्यासाठी सोशल मीडियाचा अधिकाधिक वापर करताना दिसतात. तसेच काही समाजभान नसलेल्या आणि विघ्नसंतोषी लोकांचाही मोठा भरणा आहे. ही मंडळी लहान, तीव्र, भडक तसेच जातीय तेढ निर्माण करणाऱ्या, शांतता भंग करणाऱ्या पोस्ट शेअर करण्यावर भर देतात. यातील एकही पोस्ट तुमच्याकडून चुकून शेअर झाली, लाईक किंवा फॉरवर्ड झाली तर तुमच्यावरही गुन्हा दाखल होऊ शकतो.

मुलींनो डीपी सांभाळा

काही तरूणी व्हॉट्सॲपसारख्या सोशल मीडियावर आपले स्वत:चे छायाचित्र डीपी म्हणून ठेवतात. मात्र, याच डीपीचा वापर करून सायबर गुन्हेगार अश्लील पोस्ट तयार करणे किंवा गैरवापर करून बदनामीचा प्रयत्न करू शकतात.

त्यामुळे तरूणींनी सावधगिरी बाळगणे गरजेचे आहे. आपल्या छायाचित्राचा गैरवापर टाळण्यासाठी स्वत:चे छायाचित्र न ठेवता निसर्गचित्र, सुभाषितांची छायाचित्रे ठेवणे कधीही योग्य ठरू शकते.

सोशल मीडियाचा वापर करा सांभाळून

फेसबुक, व्हॉट्सॲप, यू-ट्यूबच्या माध्यमातून वेगवेगळे प्रक्षोभक, अश्लील मेसेज शेअर होतात. लहान मुलांनाही व्हॉट्सॲप, फेसबुकचे जणू व्यसनच लागले आहे. सोशल मीडियाच्या वापराने जगाशी कनेक्ट होता येते, मात्र त्याचा अतिवापर टाळण्याची गरज आहे. सोशल मीडियावर आलेल्या माहितीची सत्यता पडताळून जर ती शेअर केली तरच लोकांना चांगली आणि योग्य माहिती मिळू शकते.

अशी घ्या काळजी

- सोशल मीडियाचा वापर करताना प्रायव्हसी सेटिंग योग्यप्रकारे सेट करून नंतरच आपले फोटो किंवा मेसेज शेअर केले पाहिजेत.

- एखाद्या व्यक्तीला ब्लॉक करण्याचा पर्याय फेसबुक, व्हॉट्सॲपवर उपलब्ध आहे.

- एखादी पोस्ट नको असल्यास ती काढून टाकली जाऊ शकते.

- मेसेज शेअर किंवा लाईक करताना आपण काही चुकीचे पाठवत नाही ना, याची काळजी घेणे गरजेचे आहे.

अनोळखी व्यक्तींना आपली माहिती देऊ नका. तसेच सोशल मीडियाचा वापर करताना काळजी घेणे गरजेचे आहे. आक्षेपार्ह मजकूर, पोस्टला लाईक, शेअर किंवा फॉरवर्ड करू नये. सध्या सण, उत्सव सुरू असून, सायबर विभाग सोशल मीडियावर लक्ष ठेवून आहे. आक्षेपार्ह मजूकर, फोटो सोशल मीडियावर शेअर, लाईक, फॉरवर्ड केल्याचे आढळून आल्यास कारवाई केली जाईल.

- भाग्यश्री कांबळे, पोलीस उपनिरीक्षक तथा सायबर कक्षप्रमुख

...तर होऊ शकते शिक्षा

सोशल मीडियावर धार्मिक भावना दुखावतील, अशा पोस्ट शेअर केल्यास अथवा लाईक, फॉरवर्ड केल्याचे सिद्ध झाल्यास कमीत कमी ३ वर्ष शिक्षा व ५ लाखांपर्यंत दंड होऊ शकतो. त्यामुळे सोशल मीडियाचा वापर करताना सर्वांनी सावधगिरी बाळगावी, असे आवाहन सायबर विभागाने केले आहे.