भयंकर! डोळ्यात मिरचीपूड टाकत तलाठ्याची हत्या; चाकूने भोसकल्याची खळबळजनक घटना

जखमी तलाठ्याचा परभणी येथे उपचारासाठी नेत असताना वाटेतच मृत्यू झाला.

लोकमत न्यूज नेटवर्क, आडगाव रंजे (जि. हिंगोली) : वसमत तालुक्यातील आडगाव (रंजे.) येथील तलाठी कार्यालयात शेतीविषयक कागदपत्रासाठी आलेल्या एकाने तलाठ्याच्या डोळ्यात मिरचीपूड फेकून चाकूने भोसकल्याची खळबळजनक घटना बुधवारी (दि. २८) दुपारी १ वाजेच्या सुमारास घडली. जखमी तलाठ्याचा परभणी येथे उपचारासाठी नेत असताना वाटेतच मृत्यू झाला.

संतोष देवराव पवार (३६, रा. वाढोणा, ता. सेनगाव) असे हत्या झालेल्या तलाठ्याचे नाव आहे. ते बुधवारी दुपारी आडगाव (रंजे.) येथील तलाठी सज्जा कार्यालयात नेहमीप्रमाणे कामकाज करत होते. त्यांच्याकडे बोरी सावंत सज्जाचा अतिरिक्त पदभार असल्याने त्या ठिकाणचा एकजण शेतीविषयक कामकाजासंदर्भात तिथे आला. या ठिकाणी दोघांमध्ये वाद होऊन बाचाबाची झाली. त्याने तलाठी संतोष पवार यांच्या डोळ्यात मिरचीपूड टाकून चाकूने भोसकले. ग्रामस्थांनी जखमी पवार यांना परभणी येथे उपचारासाठी हलविले. परंतु, डाॅक्टरांनी तपासणी करून मृत घोषित केले.