चालकाचे नियंत्रण सुटल्याने कार ॲटोवर धडकली; भीषण अपघातात पती- पत्नी जागीच ठार

सेनगाव रस्त्यावरील सरकळी ते ब्रम्हपुरी दरम्यान घडली दुर्घटना

नर्सी नामदेव : हिंगोली - सेनगाव राज्य रस्त्यावरील सरकळी पाटी ते ब्रम्हपुरी दरम्यान २१ रोजी सकाळी १०. ३० वाजण्याच्या सुमारास कार व ॲटोची समोरासमोर धडक होत भीषण अपघात झाला. या अपघातात ॲटोमधील पती- पत्नी हे दाम्पत्य जागीच ठार झाल्याची दुर्घटना घडली आहे.

हिंगोली येथून सेनगावकडे एमएच २६ बीसी ७४४९ या क्रमांकाची कार जात असताना, ॲटो क्रमांक एमएच ३८ ई ११४७ हा ॲटो सेनगावयेथून हिंगोलीकडे जात हाेता. यादरम्यान सरकळी पाटी ते ब्रम्हपुरी दरम्यान रस्त्यावर चालकाचे नियंत्रण सुटल्याने कार समोरील येणाऱ्या ॲटोवर धडकून भीषण अपघात झाला. या अपघातामध्ये ॲटोमधील अंकुश शकुराव साबळे वय ३५, व अनुराधा अंकुश साबळे, वय ३०, रा. लिंबाळा हुडी ता. सेनगाव येथील पती -पत्नी जागीच ठार झाले आहेत.

या अपघातामध्ये कारमधील सेनगाव पोलीस ठाण्याचे कर्मचारी सुभाष चव्हाण हे जखमी झाले आहेत. या अपघाताची माहिती नर्सी पोलिस ठाण्याला मिळताचं, सपोनि नागरे, जमादार रामराव पोटे, नंदकिशोर महाजन पोलीस कर्मचाऱ्यांनी घटनास्थळी भेट देत दोन्ही मयतांना उत्तरीय तपासणीसाठी हिंगोली येथील शासकीय रुग्णालयात दाखल केले. या घटनेचा पुढील तपास नर्सी पोलीस करीत आहेत.