तरुणाने हॉटेलमध्ये घुसून वडिलांच्या मित्राचा कापला गळा; छातीवर केले सपासप वार

आरोपीस पोलीस वाहनातून हलवित असताना मृताचे नातेवाईक वाहनावर चालून गेले.

आखाडा बाळापूर ( जि.हिंगोली) : कळमनुरी तालुक्यातील शेवाळा येथील गौतम कोंडबा नरवाडे या ५५ वर्षीय इसमाचा खंजरने गळा कापून खून केल्याची घटना गुरुवारी सकाळी १० च्या सुमारास घडली. यानंतर गावात जाऊन आखाडा बाळापूर पोलिसांनी आरोपीस ताब्यात घेतले असले तरीही मयताच्या नातेवाईकांनी आरोपीस आमच्या ताब्यात द्या, अशी मागणी करीत बाळापूर येथे राष्ट्रीय महामार्गावर रास्ता रोको सुरू केल्याने गोंधळ उडाला आहे.

शेवाळा येथील गौतम नरवाडे हे चौकातील एका हॉटेलमध्ये सकाळी दहा वाजता चहा पित बसले होते. शेख मुस्तफा शेग जिलानी हा युवक तेथे आला. त्याने काही कळायच्या आता नरवाडे यांचा खंजरने गळा कापून छातीत दोन ते तीन वार केले. यानंतर तो तेथेच थांबला. लोकांनी गर्दी केली. हळूहळू मयताचे नातेवाईकही जमले. त्यानंतर काहींनी आरोपीस मारहाण केली. 

तोपर्यंत पोलीसही दाखल झाले होते. त्यांनी आरोपीस वैद्यकीय चाचणीसाठी बाळापूरच्या ग्रामीण रुग्णालयात आणले. अवघ्या एक किमी अंतरावर असलेल्या शेवाळा येथील नागरिकही मागोमाग तेथे धडकले. आरोपीस वाहनातून हलवित असताना ते वाहनावर चालून गेले. मात्र पोलिसांनी शिताफीने आरोपीस कळमनुरीला हलविले. आरोपीस आमच्या ताब्यात द्या म्हणून ग्रामस्थांनी आखाडा बाळापूर येथे राष्ट्रीय महामार्गावर रास्ता रोको केला. बायपासही अडविला आहे. दुपारी १ वाजेपर्यंत हा गोंधळ सुरू होता. उपविभागीय अधिकारी किशोर कांबळे बाळापुरात दाखल झाले असून नातेवाईकांच्या भावना जाणून घेत आहेत.

मयत हे पाणीपुरवठा योजनांच्या गळती दुरुस्तीची कामे करतात. तर आरोपीच्या वडिलाचे मित्र आहेत. शिवाय मयत नरवाडे यांच्या पत्नी ग्रामपंचायत सदस्याय आहेत. शेखने हे टोकाचे पाऊल का उचलले? हे मात्र अजून कळाले नाही.