जागा पकडण्यावरून दोन प्रवासी भिडले; एकाची बसवर दगडफेक

हिंगोली तालुक्यातील दुर्गसावंगी येथील घटना

हिंगोली : एसटीबसमध्ये जागा पकडण्यावरून दोन प्रवाशांत वाद झाला आणि यातून एकाने बसवर दगडफेक केल्याची घटना हिंगोली तालुक्यातील दुर्गसावंगी येथे १५ एप्रिल रोजी रात्री घडली. याप्रकरणी दगडफेक करणाऱ्याविरूद्ध बासंबा पोलिस ठाण्यात रात्री उशीरा गुन्हा नोंदविण्यात आला.

हिंगोली आगाराची एमएच १४ बीटी १६६९ ही बस हिंगोली ते दुर्गसावंगी फेरीसाठी गेली होती. बस दुर्गसावंगी येथे पोहोचल्यानंतर परतीच्या प्रवासादरम्यान जागा पकडण्यावरून दोन प्रवाशांत वाद झाला. वाद वाढत असल्याने बसचा चालक- वाहकाने दोन्ही प्रवाशांची समजूत घातली. परंतु, त्यातील प्रकाश पंजाब कवडे (रा.दुर्गसावंगी) याने बसमधून खाली उतरत दगडफेक केली. यात बसच्या पाठीमागील काच फुटली. यात बसचे सुमारे दहा ते पंधरा हजारांवर नुकसान झाले.

चालकाने बस बासंबा ठाण्यात आणून तक्रार दाखल केली. याप्रकरणी बसचा चालक सारंगधर आगलावे यांच्या फिर्यादीवरून प्रकाश पंजाब कवडे याच्या विरूद्ध गुन्हा नोंदविण्यात आला. अधिक तपास बासंबा ठाण्याचे पोलिस करीत आहेत.