२६/११ च्या मुंबई हल्ल्याचा मास्टरमाईंड झकीर रेहमानला जामीन

पाकिस्तानमधील दहशतवादविरोधी न्यायालयाने २६/११च्या मुंबई हल्ल्याचा मास्टरमाईंड झकीर उर रेहमान लखवीला जामीन मंजूर केला आहे.

ऑनलाइन लोकमत 

लाहोर, दि. १८ - दहशतवादाविरोधात कठोर पावले उचलू अशी वल्गना पाकच्या पंतप्रधानांनाी केली असतानाच पाकिस्तानमधील दहशतवादविरोधी न्यायालयाने २६/११च्या मुंबई हल्ल्याचा मास्टरमाईंड झकीर उर रेहमान लखवीला जामीन मंजूर केला आहे. एकीकडेे मुंबई हल्ल्याचा सूत्रधार हाफीज सईद पाकमध्ये मोकाट फिरत असतानाच लखवीलाही जामीन मिळाल्याने तीव्र संताप व्यक्त होत आहे. 

२६/११ च्या मुंबई हल्ल्याप्रकरणी झकीर उर रेहमान लखवी आणि अन्य सात जणांविरोधात पाकिस्तानमधील दहशतवादविरोधी न्यायालयात खटला सुरु आहे. याप्रकरणी पाकमधील सुरक्षा यंत्रणांनी लखवी, अब्दूल वाजीद, मझहर इक्बाल, शाहीद जमील रियाझ, जमील अहमद आणि युसूफ अंजूम यांना २००९ मध्ये अटक केली होती. या सर्वांविरोधात मुंबई हल्ल्यांचा कट रचणे,  आर्थिक सहाय्य करणे अशा विविध कलमांखाली खटला सुरु आहे. याप्रकरणातील झकीर उर रेहमान लखवीला गुरुवारी पाकिस्तानमधील न्यायालयाने पाच लाख रुपयांच्या बॉंडवर जामीन मंजूर केला. 

मुंबई हल्ल्याप्रकरणी पाकमधील सुनावणीप्रक्रिया संथगतीने सुरु असल्याचे भारताने वारंवार निदर्शनास आणून दिले आहे. पाकिस्तान दहशतवादाविरोधात गंभीर असेल तर त्यांनी आधी हा खटला झटपट निकाली काढावा अशी मागणीही  भारताने केली होती. पेशावरमधील शाळेवर दहशतवादी हल्ला झाल्यावर पाकिस्तानचे पंतप्रधान नवाझ शरीफ यांनी दहशतवादाविरोधात कठोर पावले उचलण्याची घोषणा केली होती. यानुसार फाशीच्या शिक्षेवरील बंदी तातडीने उठविली आणि दहशतवादाविरुद्ध सात दिवसांत ठोस कृती आराखडा तयार करण्याचा निश्चयही शरीफ यांनी जाहीर केला होता. मात्र या गर्जनेला २४ तासांचा कालावधी लोटला असतानाच पाकमधील कोर्टाने रेहमानला जामीन दिला आहे. या निर्णयावर भारताने नाराजी दर्शवली आहे.