अॅमेझॉनवर विकले जाणारे अॅपलचे 90 टक्के चार्जर बनावट

अॅमेझॉन, ग्रुपॉनसारख्या ऑनलाइन विक्री करणाऱ्या ऑनलाइन साइट्सवर विकले जाणारे अॅपलचे 90 टक्के चार्जर, यूएसबी केबल, यूएसबी पॉवर अॅडॉप्टर बनावट असल्याची धक्कादायक माहिती समोर आली आहे.

 

 

ऑनलाइन लोकमत

सॅन फ्रॅन्सिस्को, दि. 20 - तुम्ही अॅमेझॉनवरून अॅपलची उत्पादने खरेदी करत असाल तर सावधान. अॅमेझॉन, ग्रुपॉनसारख्या ऑनलाइन विक्री करणाऱ्या साइट्सवर विकले जाणारे  अॅपलचे  90 टक्के चार्जर, यूएसबी केबल,  यूएसबी पॉवर अॅडॉप्टर बनावट असल्याची धक्कादायक माहिती समोर आली आहे. दरम्यान, अॅपलच्या नावे बनावट उत्पादनांची ऑनलाइन विक्री करणाऱ्या मोबाइल स्टार एलएलसीविरुद्ध अॅपलने न्यायालयात खटला दाखल केला आहे. 

अॅपलने कॉपीराइट उल्लंघन प्रकरणी प्रत्येकी 1 लाख 50 डॉलर आणि ट्रेडमार्कचा गैरवापर केल्याप्रकरणी दोन दशलक्ष डॉलरचा दावा दाखल केला आहे. तसेच अॅपलच्या नावे खपवली जाणारी बनावट उत्पादने ही ज्वलनशील असून, त्यामुळे ग्राहकांसाठी ती धोकादायक असल्याचे म्हटले आहे. 

"आयफोनचे निर्माते असलेल्या अॅपलची अॅमेझॉनवर विकली जाणारी दहापैकी नऊ उत्पादने ही बनावट असतात," असे अॅपलने ट्रेडमार्क उल्लंघनप्रकरणी गुरुवारी दाखल करण्यात आलेल्या याचिकेत म्हटले. अॅपलने अॅमेझॉनवरून पॉवर प्रॉडक्ट खरेदी केले होते.  पडताळणी केली असता हे प्रॉडक्ट बनावट असल्याचे निष्पन्न झाले. त्यानंतर अॅपलने याबाबतची माहिती अॅंमेझॉनला दिली. दरम्यान, खरेदी करण्यात आलेल्या या बनावट पॉवर प्रॉडक्टचे उत्पादन मोबाइल स्टारने केले होते," असा दावा या खटल्यात अॅपलकडून करण्यात आला आहे. तर अॅमेझॉनवर बनावट उत्पादनांना थारा दिला जात नाही. उत्पादनांचा खरेपणा काटेकोरपणे तपासूनच ती विक्रीसाठी ठेवली जातात. असे अॅमेझॉनने  म्हटले आहे.