आमरस पुरी, विंदांची पणती, दादा कोंडके अन् ‘स्कोअर काय?’; संमेलनाची झोकात सुरुवात

सिलिकॉन व्हॅलीत मराठी स्मरणरंजनाची धमाल, भेटीगाठी-खाण्यापिण्याची लयलूट

थेट अमेरिकेतून अपर्णा वेलणकर

सान होजे कन्व्हेन्शन सेंटर नावाच्या अती-विस्तीर्ण वास्तूमध्ये एकीकडे ज्येष्ठ नागरिकांसाठीचा ‘उत्तररंग’ रंगला आहे..  दुसरीकडे बी कनेक्ट मध्ये उद्योजकता विकास आणि स्टार्टअप पिचिंगची सत्रे सुरु आहेत .. एकांकिकांच्या स्पर्धा ऐन भरात आहेत.. ढोलताशा आणि मल्लखांब टीमच्या रिहर्सल्सना   जोर आला आहे... अमेरिकेतील मराठी शाळांच्या धमाल वर्गात महेशकाका (काळे)सोबत मुलांचा चिवचिवाट सुरु आहे..

दुपारी आमरस -पुरीचे जेवण जेवत असताना ज्याच्या नजरेसमोर मोबाईलचा स्क्रीन त्याला जो तो विचारतोय “स्कोअर काय झाला?”... हे बृहन्महाराष्ट्रमंडळाच्या सान होजे अधिवेशनातले पहिल्या दिवसाचे चित्र! शेवटी एकदा वर्ल्ड कप सेमीफायनलमध्ये  भारताने इंग्लंडच्या संघाला तंबूत धाडले आणि सान  होजे कन्व्हेन्शन सेंटरमध्ये ‘गणपती बाप्पा मोरया’चा एकच गजर झाला!...इतक्या जोरात, की   तिथे काम करणाऱ्या अमेरिकन लोकांच्या काळजात धडधडलेच! त्यातल्या एकाने दचकून मला विचारले, व्हॉट हापंड? ... मी हसून म्हटले, यु वुडन्ट नो!

पुण्याच्या रुबी हॉल क्लिनिकचे डॉ. परवेझ ग्रांट, बीएमएमचे अध्यक्ष संदीप दीक्षित अन्  अधिवेशनाचे प्रमुख संयोजक प्रकाश भालेराव यांच्या उपस्थितीत एकाच वेळी विविध दालनात सुरु झालेल्या सत्रांनी संमेलनाचा शुभारंभ झाला. 

मैफल रंगली
पर्सिस्टंटचे प्रमुख आनंद देशपांडे, भारत विकास ग्रुपचे हणमंतराव गायकवाड, रवी पंडित, वैभव दाभाडे आदी प्रमुख उद्योजकांसोबत महत्वाची सत्रे  संपन्न तब्बल सहा हजार लोकांनी नोंदणी केलेले हे आजवरचे सर्वात भव्य बीएमएम अधिवेशनआहे.  सण होजेच्या डाउनटाऊनमधले महत्वाचे चौक रेशमी साड्या आणि कुर्त्यानी गजबजून गेले आहेत.  पहिल्या रात्री झालेल्या रंगारंग बँक्वेट डिनरसाठी जगप्रसिद्ध जॅझ कलाकार जॉर्ज ब्रुक्स यांची मैफल रंगली.

गुंतागुंतीचे पदर उलगडले
निवृत्त जीवनाचे गुंतागुंतीचे पदर उलगडत लोकमतच्या कार्यकारी संपादक अपर्णा वेलणकर यांनी केलेल्या बीजभाषणाने डोळे पाणावलेले उपस्थित नंतर ज्येष्ठ नागरिकांच्या धमाल फॅशन शो मध्ये रंगून गेले! त्यात ठसकेबाज लावण्यांपासून हाफ चड्डी घालून आलेल्या दादा कोंडकेंपर्यंत कहर धमाल होती!..रात्री ‘सारेगम’च्या गाण्यांची मैफल रंगली ! 

...आणि झाली अवचित भेट 
‘मी कोण आहे माहिती आहे का, विंदा पणजोबांची पणती’ असे सांगत मराठी शाळांच्या दालनात चिमुकल्या अन्वयी काळेने आपल्या अमेरिकन वळणाच्या गोड मराठीत विंदा करंदीकरांच्या कविता सादर केल्या! अल्याड-पल्याडच्या दहा हजार मैलांना क्षणात जोडणारा  इतका सुंदर पूल दुसरा कुठला असेल?