Corona Virus : भयावह! कोरोनाग्रस्त वडिलांना घेऊन लेकीची धावपळ; 'कोणी मेलं तरच मिळेल बेड' असं मिळतंय उत्तर

China Corona Virus : चीनमधील एका तरुणीचा व्हिडीओ सध्या सोशल मीडियावर जोरदार व्हायरल होत आहे.

चीनमध्ये कोरोनामुळे गंभीर परिस्थिती निर्माण झाली आहे. पुन्हा एकदा कोरोनाचा प्रकोप पाहायला मिळत आहे. वेगाने वाढत असलेल्या रुग्णांच्या संख्येने जगाचं टेन्शन वाढवलं आहे. धडकी भरवणारं चित्र सध्या चीनमध्ये पाहायला मिळत आहे. रुग्णांच्या संख्येत मोठी वाढ झाल्याने रुग्णालयं खचाखच भरली आहेत. एकही बेड उपलब्ध नसल्याने जमिनीवर रुग्णांना ठेवून उपचार केले जात आहेत. तसेच मृतांचा आकडा वाढल्याने शवागृहही भरली आहे. मृतदेहांचे ढीग पाहायला मिळत आहेत. अंत्यसंस्कारासाठी लांबच लांब रांगा लागल्या आहेत.

कोरोनामुळे आरोग्य यंत्रणा पार कोलमडली आहे. औषधांचा मोठा तुटवडा निर्माण झाला आहे. चीनमधील एका तरुणीचा व्हिडीओ सध्या सोशल मीडियावर जोरदार व्हायरल होत आहे. तरुणीच्या वडिलांनाही रुग्णालयात दाखल करण्यात आलं होतं. त्यांना कोरोना झाला होता. पण त्यांना अजूनही बेड मिळालेला नाही. तिने एक व्हिडीओ शेअर करत आपल्या मनातील भावना व्यक्त केल्या आहेत. "माझे वडील खूप आजारी होते. त्यांना घेऊन आम्ही तीन रुग्णालयात गेलो. पण बेड मिळाला नाही. त्यांच्यावर उपचारही झाले नाहीत. डॉक्टर म्हणाले, तुझे वडील खूप आजारी आहेत. पण आमच्याकडे बेड रिकामे नाहीत."

"आज दहा लोक मेल्यानंतर दहा बेड खाली झाले. आता या ठिकाणी एकही बेड नाही. कोणी तरी मेल्यावरच सर्वात आधी ज्या रुग्णांनी बेडसाठी नंबर लावला आहे, त्यांना बेड मिळेल. त्यानंतर तुझ्या वडिलांना बेड मिळेल" असं डॉक्टर सांगत असल्याचं ही तरुणी व्हिडीओमध्ये म्हणाली. चीनमध्ये कोरोनाचा कहर पाहायला मिळत आहे. एका हिंदी वेबसाईटने याबाबतचे वृत्त दिले आहे. तज्ज्ञांनी दिलेल्या माहितीनुसार येत्या तीन महिन्यांत म्हणजेच ९० दिवसांत चीनची ६० टक्के आणि जगभरातील १० टक्के लोकसंख्या कोरोनाने संक्रमित होऊ शकते.

चीनमध्ये कोरोनाचा विस्फोट; रुग्णालयात मृतदेहांचे ढीग, ८० कोटी लोकांना धोका

ही केवळ सुरुवात असून कोरोनाच्या संक्रमणामुळे २० लाख लोकांचा मृत्यू होऊ शकतो. तर, ८० कोटी लोक कोरोनाबाधित होऊ शकतात असंही म्हटलं आहे. विषाणू तज्ज्ञ एरिक फेइगल यांच्या मते, चीनची राजधानी बीजिंगमध्ये मृतदेहांवर अंत्यसंस्कार करण्याचे काम सातत्याने सुरू आहे. शवागृह भरली आहेत. मृतदेह ठेवण्यासाठी रेफ्रिजरेटरची गरज असते. २००० मृतदेहांवर अंत्यसंस्कार करावे लागले. ते म्हणाले की, २०२० ची परिस्थिती पुन्हा येत असल्याचे दिसते, परंतु यावेळी ते युरोपसह पाश्चात्य देशांमध्ये नाही तर चीनमध्ये घडत आहे. चीनमध्ये कोरोना निर्बंध शिथिल केल्यानंतर कोरोनाच्या रुग्णांमध्ये चिंताजनक वाढ झाल्याचे सांगण्यात येत आहे.

सर्व ठळक बातम्यांसाठी जरूर वाचा महाराष्ट्रातील अव्वल मराठी वेबसाईट "लोकमत डॉट कॉम"