लग्नात नाचून बाहेर पडला! कॅनडाच्या कुख्यात गँगस्टरवर धडाधड गोळीबार, जागीच मृत्यू

अमरप्रीत हा कॅनडातील पहिल्या १० गँगस्टरांपैकी एक आहे. या लग्न समारंभाला ६० हून अधिक लोक उपस्थित होते.

कॅनडामध्ये तेथील कुख्यात गँगस्टर्सपैकी एक असलेल्या अमरप्रीत समरा उर्फ (चकी) याची हत्या करण्यात आली आहे. वँकूव्हरमध्ये तो एका लग्नसमारंभाला गेला होता, तिथे त्याने डान्सही केला होता. परंतू, तिथून बाहेर पडताच त्याच्यावर गोळ्या झाडण्यात आल्या आहेत. 

अमरप्रीत हा कॅनडातील पहिल्या १० गँगस्टरांपैकी एक आहे. या लग्न समारंभाला ६० हून अधिक लोक उपस्थित होते. अमरप्रीतची हत्या किती लोकांनी केली हे समोर आलेले नाहीय. परंतू, अमरप्रीत समराची विरोधी टोळी ब्रदर्स कीपर्स ग्रुपने ही हत्या केल्याचा संशय पोलिसांना आहे. याच गटाच्या गुंडांनी अमरप्रीतवर गोळ्या झाडल्याचा अंदाज लावला जात आहे. 

या हत्याकांडानंतर सरे-डेल्टा सीमेवर आग लागलेल्या अवस्थेत एक वाहन सापडले आहे. या वाहनाचा वापर हल्लेखोरांनी केला असावा, असा संशय पोलिसांनी व्यक्त केला आहे. 

या लग्नसोहळ्याला अमरप्रीतचा भाऊ रविंदरही आला होता. तो यूएन गँगशी संबंधित आहे. या गँगची बीके, वुल्फ पॅक आणि रेड स्कॉर्पियन टोळ्यांसोबत गेल्या अनेक वर्षांपासूनची दुश्मनी आहे. यातून त्यांच्या टोळीयुद्ध होत असते. अमरप्रित हा लहान वयापासून या गुन्हेगारी क्षेत्राशी जोडला गेलेला आहे.