आगळीवेगळी शहरे

जयपूर शहराला पिंक सिटी म्हणतात. कारण कधीकाळी तेथील बहुतेक घरांच्या भिंती गुलाबी होत्या. असेच एक शहर

सिटी ऑफ ब्ल्यू 
जयपूर शहराला पिंक सिटी म्हणतात. कारण कधीकाळी तेथील बहुतेक घरांच्या भिंती गुलाबी होत्या. असेच एक शहर मोरोक्कोमध्ये चेफचॉवेन नावाने आहे; परंतु त्याची ओळख ब्लू सिटी अशी आहे. मोरोक्कोतील हे सगळ्यात सुंदर शहर आहे. येथे घरांपासून सगळ्या गोष्टी निळ्या आहेत. या शहराला १९३० मध्ये यहुदी विस्थापितांनी वसवले होते. मोरोक्कोतील प्रसिद्ध पर्यटनस्थळांपैकी हे एक शहर. या शहरात पर्यटकांसाठी
२०० हॉटेल्स आहेत.

सिटी आॅफ सोल

जिवंत माणसांपेक्षा जास्त संख्येत मृतदेहांचे दफन होते किंवा एखाद्या शहरातील प्रत्येक नागरिक हा आध्यात्मिक आहे, अशी शहरे तुम्हाला माहीत आहेत का? अमेरिकेतील सॅनफ्रान्सिस्कोजवळ कोलमा शहरात जिवंत लोकांपेक्षा जास्त संख्येने दफन करण्यात आलेल्या लोकांची संख्या जास्त आहे. १९०० च्या जवळपास सॅनफ्रान्सिस्कोमध्ये मृतदेहांना दफन करण्यासाठी जागा कमी पडू लागली तेव्हा तेथे मरण पावलेल्यांना येथे दफन केले जाऊ लागले. आज कोलमाची लोकसंख्या सुमारे १,८०० आहे; परंतु १.५ दशलक्ष लोकांच्या कबरी तेथे आहेत. यामुळे या शहराला ‘सिटी आॅफ सोल’ आणि ‘सिटी आॅफ द सायलेंट’ म्हणूनही ओळखले जाते.

जमिनीखालचे अत्यंत आधुनिक शहर कुबर

आॅस्ट्रेलियात एडिलेडपासून ८४६ किलोमीटर दूर असलेल्या कुबर शहराचा शोध १९१५ मध्ये लागला. हे शहर जमिनीखाली आहे. प्रचंड ऊन आणि उकाड्यापासून सुटका करून घेण्यासाठी आपण जमिनीखाली का राहू नये, असा विचार तेथील लोकांनी केला व त्यातून या शहराचा विकास झाला. जमिनीच्या खाली लोक राहत असले तरी कोणत्याही महागड्या शहरातील जीवनशैली येथे बघायला मिळेल. येथे चर्च, स्टोअर, गॅलरी, हॉटेल, ऐशआरामी सुविधा उपलब्ध आहेत. हॉलीवूडमधील अनेक मोठ्या चित्रपटांचे चित्रीकरणही या जमिनीखालच्या शहरात झाले आहे.


कैरोतील कचऱ्यासाठी  शहराची कचराकुंडी

इजिप्तची राजधानी कैरोतील कचरा टाकण्यासाठी त्याच्या जवळचे गाव कचराकुंडी बनवण्यात आले आहे. २००९ मध्ये कैरोतील कचऱ्याच्या वाढत्या प्रश्नाला सोडवण्यासाठी तो कचरा या जागेत टाकला जाऊ लागला व त्याची ओळख स्लमसिटी बनले. या शहरात जवळपास ६० हजार लोक वास्तव्यास आहेत. शहराच्या प्रत्येक इंचावर कचरा पडलेला दिसतो. २००८ मध्ये स्वाइन फ्लूला आवरण्यासाठी या शहरातील जवळपास साडेतीन लाख डुकरांना मारून टाकण्यात आले होते.


विषारी वायूचे शहर

जपानचे माऊंट ओयामा शहर मियाकी जिमा बेटावर असून, त्याची लोकसंख्या जवळपास २,८०० आहे. हे शहर टोक्योपासून ११० मैल असून, तेथील रहिवासी अत्यंत असुरक्षित आहेत. येथे विषारी वायूचा एवढा परिणाम होतो की, लोकांचा मृत्यूही होऊ शकतो. जेव्हा तेथील हवेमध्ये विषाचे प्रमाण कमालीचे वाढते त्यावेळी लोकांना त्यांनी घरातच राहावे म्हणून भोंगा वाजवून सावध केले जाते.