डोनाल्ड ट्रम्प यांनी आखली योजना; गाझा पट्टी ताब्यात घेणार अन्..! अनेक मुस्लिम देशांचा विरोध

Donald Trump on Gaza : अमेरिकेचे राष्ट्राध्यक्ष डोनाल्ड ट्रम्प यांनी 4 फेब्रुवारी रोजी पत्रकार परिषदेत मोठी गोष्ट बोलून दाखवली.

Donald Trump on Gaza : अमेरिकेचे राष्ट्राध्यक्ष डोनाल्ड ट्रम्प यांनी पश्चिम आशियातील अनेक दशके जुने संकट सोडवण्यासाठी एक योजना आखली आहे. यानुसार, अमेरिका गाझा पट्टीवर ताबा मिळवणार असून, येथे राहणाऱ्या किंवा विस्थापित झालेल्या पॅलेस्टिनींना शेजारील इजिप्त आणि जॉर्डन देशात आश्रय घेण्यासाठी पाठवणार आहे. "एवढी दशके मृत्यू आणि विनाशाचे प्रतीक असलेली गाझा पट्टी लोकांसाठी अत्यंत वाईट आहे, यावर माझा ठाम विश्वास आहे," असे ट्रम्प यांनी इस्रायलचे पंतप्रधान बेंजामिन नेतन्याहू यांच्यासोबत पत्रकार परिषदेत म्हटले. 

अमेरिकेचे राष्ट्राध्यक्ष डोनाल्ड ट्रम्प पुढे म्हणाले की, गाझातील लोकांनी इच्छुक देशांमध्ये जावे. आम्ही गाझा पट्टीवर ताबा मिळवू आणि यावर काम करू. आम्ही याची जबाबदारी घेऊ आणि साइटवर उपस्थित असलेले सर्व धोकादायक बॉम्ब आणि इतर शस्त्रे नष्ट करू. साइट समतल करू आणि नष्ट झालेल्या इमारती दुरुस्त करू. असा आर्थिक विकास तयार करू ज्यामुळे परिसरातील लोकांना अमर्यादित नोकऱ्या आणि घरे मिळतील, असे ट्रम्प म्हणाले.

काय आहे ट्रम्प यांची योजना?
टाईम्स ऑफ इंडियाच्या वृत्तानुसार, मध्य पूर्वेचा रिव्हिएरा बनण्याची क्षमता असलेले गाझा पर्यटन आणि व्यापार केंद्र म्हणून पुनर्बांधणी करण्याची ट्रम्प यांची कल्पना आहे. ते स्वतः रिअल इस्टेट डेव्हलपर होते. या कारणास्तव, या गोष्टीने त्यांच्या भू-राजकीय विचारांवर अनेकदा प्रभाव टाकला आहे. 

नुकसान भरुन काढण्यासाठी बराच वेळ लागेल
युनायटेड नेशन्स एन्व्हायर्नमेंट प्रोग्राम (UNEP) ने म्हटले आहे की, गाझामध्ये झालेले नुकसान भरुन काढण्यासाठी बराच वेळ लागेल. या युद्धामुळे पाणी व स्वच्छतेबाबत प्रश्न निर्माण झाला आहे. छावण्या आणि आश्रयस्थानांभोवती वाढत्या कचऱ्याबाबत सावधानतेचा इशारा देण्यात आला आहे. विविध शस्त्रे आणि रसायनांमुळे येथील माती आणि पाणी दूषित झाले आहे. एका रिपोर्टनुसार, युद्धामुळे गाझा पट्टीत 50 मिलियन टनांपेक्षा जास्त मलबा जमा झाला आहे. युद्धाचे ढिगारे आणि स्फोटक अवशेष साफ करण्यासाठी 21 वर्षे लागू शकतात. 

अनेक देशांची टीका
इजिप्त, सौदी अरेबिया, संयुक्त अरब अमिराती, कतार, पॅलेस्टिनी प्राधिकरण आणि अरब लीगने संयुक्त निवेदन जारी करून अमेरिकेच्या योजनेवर टीका केली आहे. ते म्हणाले की, अमेरिकेने असे पाऊल उचलले, तर संपूर्ण क्षेत्राचे स्थैर्य धोक्यात येऊ शकते. याशिवाय संघर्षही वाढू शकतो.