इराणच्या राष्ट्राध्यक्षपदी पुन्हा हसन रुहानी

तेहरान, दि. 21- इराणचे विद्यमान राष्ट्राध्यक्ष हसन रुहानी हे सलग दुस-यांदा राष्ट्राध्यक्षपदावर विराजमान होणार आहेत. राष्ट्रपती निवडणुकीत ते विजयी ठरले आहेत. त्यांनी मुख्य प्रतिस्पर्धी इब्राहिम रईसी यांचा पराभव केला आहे.  मतमोजणीच्या वेळी त्यांनी मोठी आघाडी घेतली होती.  दोन कोटी 59 लाख मतांची मोजणी पूर्ण झाली त्यावेळी रुहानी यांना निम्म्यापेक्षा जास्त म्हणजे एक कोटी 46 लाखापेक्षा जास्त मते मिळाली होती. त्याचवेळी हसन रुहानी सलग दुस-यांदा राष्ट्राध्यक्षपदावर विराजमान होणार हे निश्चित झालं होतं. 

 

रुहानी यांचे मुख्य प्रतिस्पर्धी इब्राहिम रईसी यांच्याशिवाय मोस्तफा मीरसाली आणि मोस्तफा हासीमीताबा हे दोघे सुद्धा शर्यतीत होते पण त्यांना फक्त काही टक्के मते मिळतील. इराणच्या भविष्याच्या दृष्टीने ही निवडणूक अत्यंत महत्वाची होती. इराणमध्ये शुक्रवारी जवळपास 4 कोटी नागरीकांनी मतदानाचा हक्क बजावला. इराणमध्ये मतदान केंद्रावर रांगा लागल्या होत्या. 

 

चार वर्षांपूर्वी इराणची सत्ता मिळवताना रुहानी यांनी आंतरराष्ट्रीय स्तरावरील इराणचा विजनवास संपवण्याचे आश्वासन दिले होते. त्यानुसार त्यांनी कामही केले. इराणचे दरवाजे जगासाठी खुले केले. अर्थव्यवस्थेला रुळावर आणण्याचा प्रयत्न केला. ही निवडणूक म्हणजे मतपेटीतून फक्त जनतेचा कौल नसून, रुहानी यांनी जी धोरणे राबवली त्यावर जनतेने दिलेला निकाल आहे. 2015 मध्ये रुहानी यांनी जागतिक महासत्तांबरोबर इराणच्या अण्वस्त्र कार्यक्रम मर्यादा आणण्याचा करार करुन  जागतिक निर्बंधातून सवलत मिळवली.